کوئٹہ۔ 08 فروری (اے پی پی) وزیراعلیٰ بلوچستان جام کمال خان پارینے کہ حکومت تعلیم نا بشخ انا گچینی و اسکول آتے ٹی گچین و پوسکن آ آسراتی تے تننگ کن کثیر فنڈ فراوان کننگ ءِ ، تعلیم نا آب آ ہچ ءُ سمجھوتہ اس کننگپک و نئے استاد آتا غیر حاضری ءِ سگنگک، محکمہ تعلیم غیر فعال اسکول آتا فعالی کن گچین گام گیج چست کے و استاد و چناتا حاضری نا مانیٹرنگ نا نظام ءِ پین فعال و گچین کننگے ۔ داخیال آتا درشانی ءِ او محکمہ تعلیم نا امور نا بابت تروک آ احوال اٹی کرے۔ صوبائی وزیر پرائمری تعلیم محمد خان لہڑی، صوبائی وزیر ہائر ایجوکیشن میر ظہور احمد بلیدی، محکمہ تعلیم نا کمامدار و پرائمری تعلیم اٹی صوبائی حکومت نا پارٹنر یونیسیف نا نمائندہ غاک ہم دیوان اٹی ساڑی ئسر وخت اس کہ سیکرٹری پرائمری تعلیم محمد طیب لہڑی نا کنڈآن محکمانہ امور، ایجوکیشن مینجمنٹ انفارمیشن سسٹم جی آئی ایس پروفائل و ریئل ٹائم مانیٹرنگ سسٹم نا بارواٹ احوال تننگا، او پارے کہ صوبہ ٹی پرائمری اسکول آتا کچ 14250 ءِ ہرافتیان چندی سوب آتا بناء آ مار و مسن تا 1623 اسکول غیر فعال ءُ، اوپارے کہ محکمہ نا کنڈآن غیر حاضر استاد آتا برخلاف کارروائی کننگ انگ ءِ و داوخت اسکان 16 استاد آتے اوفتا ملازمت آتیان اینک کننگا وخت اس کہ غیر حاضری کروک آ استاد آتا تنخواہ تیان کٹوتی ہم کننگ انگ ءِ، اوپارے کہ بلوچستان اسٹ انگا صوبہ ءِ ہراڑے جی آئی ایس پروفائل نا کمک اٹ اسکول آ ہنوک آ ہر چنانا ڈیٹا ساڑی ءِ و آر ٹی ایس ایم نا کمک اٹ چناو استاد آتا حاضری نا مانیٹرنگ ءِ کننگ انگ ءِ و چیف منسٹر انیشیٹیو پروگرام نا رداٹ اسکول آتے ٹی غیر دستیاب آسراتی تا دستیابی ءِ المی جوڑ کننگ انگ ءِ ، دیوان اٹی فیصلہ کننگا کہ پین وخت اس کہ پوسکن ءُ اسکول اسے نا جوڑ کننگ کن محکمہ تعلیم نا منظوری المی مریک و اسکول آتا جوڑ کننگ کن چاہندار تعمیرات آتا خذمت ءِ دوئی کننگک تانکہ غٹ اسکول آتے اسہ وڑ ڈیزائن نا رداٹ جوڑ کرسا ہموڑے غٹ المی آسراتی تے فراوان کننگ مرے۔ داوخت آوزیراعلیٰ پارت کرے کہ غیر فعال اسکول آتا بند مننگ نا سوب آتا جاچ ءِ ہلسا اودے دمدستی وڑاٹ مرکننگے و ہرااسکول آک استاد آتا مفننگ نا سوب آن بند ءُ کابینہ نا کنڈآن تروک آ گائیڈ لائن تا رداٹ بھرتی نا عمل ءِ دمدستی وڑاٹ بناکرسا ہموڑے استاد آتے تعینات کننگے ، وزیراعلیٰ ہر ضلع ٹی کم از کم اسہ ماڈل ہائی اسکول اسے نا جوڑ کننگ و اوٹی ہاسٹل و آئی ٹی لیب انا دوئی کننگ ءِ المی جوڑ کننگ نا پارت ہم کرے ، وزیراعلیٰ پارے کہ استاد آک ننا ورناچین انا جوڑ کروک آک ءُ ہنداخاطران اوفتا قابلیت اٹی ودکی کن ٹیچر ٹریننگ پروگرام آ خصوصی چکار کننگے۔
