اسلام آباد ۔08 فروری (اے پی پی) چیئرمین سینیٹ محمد صادق سنجرانی تون ترکمانستان نا سفیر عطاد جان نیورووچ ملامو جمعہ نا دے آ داڑے اوڑدہی کرے۔ داوخت آ گپ و تران کرسا چیئرمین سینیٹ پارے کہ پاکستان و ترکمانستان نا نیام اٹ ساڑی گچین تعلقداری تے معاشی کمکاری و پارلیمانی رابطہ کاری نا کمک اٹ پین مون آ دننگے، ہڑتوم آ ملک آتا پارلیمان تا نیام اٹ گچین رابطہ غاتا کمک اٹ ایلو بشخ آتے ٹی کمکاری ءِ پین سوگوی تننگ مریک۔ اوپارے کہ مستین خڑک اٹی ہڑتوم آ ملک آتا نیام اٹ مواصلات نا بشخ آتے ٹی پک مروک معاہدہ غاتے حقیقت نا دروشم اس ترسا ہڑتوم آ کنڈآتا تعلقداری تے نئے بیرہ مون آ دننگ مریک بلکن داڑان الس نا کہول آ رابطہ و اسہ ایلو تون واپاری تعلقداری تے ہم سوگوی ملک۔ اوپارے کہ ہڑتوم آ ملک آتا نیام اٹ تاپی پروجیکٹ ءِ پین مون آودفنگ کن تین پہ تینی امنائی آ پین پیش رفت نا گرج ءِ۔
