اسلام آباد۔ 08 فروری (اے پی پی) وزیراعظم عمران خان احتساب ومیرٹ ءِ نظام اٹی گچینی اتنگ نا بنداوی اصول گوندسا پارینے کہ حکومت نیک نیتی اتون اصلاحات ایجنڈا اس اتسا بسنے و السی شرحالی نا خاطر نظام اٹی گچینی اتنگ نا خواہش مند ءِ، ننا حکومت نا مشن ءِ کہ بیورو کریسی ءِ سیاستی نیام تمنگ آن بچفنگے و ہر تقرری ءِ بیرہ میرٹ نا بنداو آ کننگے۔ اوداہیت ءِ جمعہ نا دے آ سول ریفارمز ٹاسک فورس انا دیوان نا کماشی ءِ کرسا پارے۔ وزیراعظم دیوان اٹی گپ و تران کرسا پارے کہ 60ء و 70 ء نا دہائی ٹی پاکستان نا سول سروس دا ڈیہہ نا غٹ آن گچین انگا سروس ئس و ڈیہہ نا ایلو ملک آک ننے آ ہیل کننگ کن بسرہ ، بدبختی اٹ سیاسی نیام تمنگ آن سول سروس نا زوال بناکرے۔ اوپارے کہ ننا حکومت نیک نیتی اتون ریفارمز نا ایجنڈا اس اتسا بسنے و السی شرحالی نا خاطر نظام اٹی گچینی اتنگ نا خواہش مند ءِ، احتساب و میرٹ ہی نظام اٹی گچینی اتنگ نا اصول ءِ ۔ وزیراعظم پارے کہ ننا حکومت نا مشن ءِ کہ بیورو کریسی ءِ سیاسی نیام تمنگ آن بچفنگے و ہر تقرری ءِ بیرہ میرٹ نا بنداو آ کننگے۔ اوپارے کہ خیبر پختونخوا ٹی ننا حکومت سروس نا انتظامی ڈھانچہ ٹی بدلی ایس ہرانا سوب آن گورننس اٹی گچینی بس۔ اوپارے کہ سول سرونٹس ءِ بے جا تنگ کننگ آن کاریم سلک، پوسٹ آ مدت ملازمت ءِ رکھ فراوان کننگک تانکہ ڈیلیوری ٹی تسلسل برجاسلے۔ وزیراعظم پارے کہ سرکاری نا بست و بند اٹی کمپنی و ادارہ غاتا بورڈ آتے ٹی گچین شہرت و اہل بندغ آتے اوار کننگ انگ ءِ تانکہ الس ءِ گچین آسراتی و سروس مہیا کننگ مرے۔ اوپارے کہ تعلیم و جان جوڑی نا بشخ غٹ آن زیات اہمیت تخک، وسیلہ غاتا زیان ءِ توروئی مریک۔ اوپارے کہ اسپیشلائزیشن نا دورءِ، ہر بشخ اٹی چاہندار بندغ آک کاریم کننگ کیرہ، دنیا نا غٹ شون ہلوک ملک آتے ٹی اسہ قدر اوار ءِ و او او چاہندار بندغ آتا میرٹ آ بھرتی ءِ۔ وزیراعظم پارے کہ لوکل گورنمنٹ نا ہندن ءُ ماڈل اس اتنگ اُن ہراٹی ہندی نمائندہ غاک السی شرحالی ٹی پبی کڑد اس ادا کیرہ۔ اوپارے کہ سیاست دان تا ٹریننگ ہم المی ءِ تانکہ سول سروس ءِ سیاسی نیام تمنگ آن بچفنگے و بیوروکریٹ بے خوف و خلیس تینا زمواری تے پورو کننگ کے۔
