اسلام آباد۔ 08 فروری (اے پی پی) پاکستان تحریک انصاف نا راہشون باسک قومی اسمبلی صالح محمد خان پارینے کہ وزیراعظم عمران خان ضلع مانسہرہ نا چندی شونداری ڈٹ آتے کن 5 ارب روپئی نا فنڈ انا منظوری ءِ تسنے ہرافتے جاری پی کے 30 انا ضمنی گچین کاری آن پد کننگک۔ جمعہ نادے آ ’’اے پی پی‘‘ تون خصوصی گپ و تران کرسا اوپارے کہ پاکستان تحریک انصاف نا حکومت الس نا خذمت آ باور کیک، تدوک آ 6 تُو اٹی ملکی معیشت شونداری نا کسر آ روان ءِ، ساڑی حکومت معیشت نا گچینی کن مشکل ءُ فیصلہ کرے ہرا ملک و قوم انا فائدہ ٹی ءُ۔ اوپارے کہ وزیراعظم عمران خان ضلع مانسہرہ نا چندی شونداری ڈٹ آتے کن 5 ارب روپئی نا منظوری ءِ تسنے ہرافتے ٹی سوئی گیس، بجلی ، مواصلات نا بشخ اٹی رابطہ روڈ، داتا بائی پاس، منور روڈ، گھنول روڈ، مونڈی سرن ویلی روڈ وخت اس کہ مانسہرہ کن پوسکن آ 132 کے وی نا گریڈ اسٹیشن نا ڈٹ آک اوار ءُ۔ اوپارے کہ علاقہ نا جوڑ جاڑ و شونداری کن دے و نن کوشست کننگ اُن۔ کوشست ءِ کہ بروک آ پنچ سال اٹی حلقہ نا جوڑ جاڑ و شونداری کن گچین کڑد ادا کننگ کیو۔ مون نا حکمرانک حلقہ نا کنڈا چکار تختوس۔ صالح محمد پارے کہ پی کے 30 اٹی ضمنی گچین کاری نا سوب آن شونداری فنڈ آتے جاری 26فروری آن پد کننگک۔ اسہ سوج اسے نا ورندی ٹی او پارے کہ این اے 13ٹی تحصیل بالاکوٹ، گڑھی حبیب اللہ ، شنکیاری جابہ و تحصیل بفہ نا چندی علاقہ غاتے زوت گیس انافراوانی نا بناءِ کننگ انگ ءِ ۔ اسہ پین سوج اسے نا ورندی ٹی صالح محمد خان پارے کہ پی کے 30 انا ضمنی گچین کاری ٹی الس پاکستان تحریک انصاف نا پندار اومیتدار سید احمد حسین شاہ ءِ وونٹ ترسا گیشتری اسے اٹ سرسہب کیر۔ اوپارے کہ تحصیل بالا کوٹ نا الس باشعور ءُ و او کس اسے نا درواٹی بفسہ۔ علاقہ نا جوڑ جاڑ و شونداری کن پاکستان تحریک انصاف نا اومیتدار ءِ وونٹ ترسا سرسہب کیر۔
