اسلام آباد۔ 08 فروری (اے پی پی) وزیر خارجہ شاہ محمود قریشی پارینے کہ پاکستان و بھارت تون ہیت و گپ آن بیدس ویل آتا ہچ ءُ ایسر اس اف، اوغانستان اٹی امن خوانہ، مصالحتی کوشست آتے ٹی اوفتا کمک ءِ کرینن و کمک ءِ برجاتخنہ، نن گچینی نا بناءِ کرینن و اولیکو سد دے انا رپورٹ اٹی اودے اوار کرینن، ننا غٹ ادارہ غاک نسخان اٹی ملار، پی آئی اے، اسٹیل مل و غٹ ادارہ غاک خراب حالیت اٹی ئسر ولے انشاء اللہ گچینی بریک، 70 سال انا بگاڑ اسہ نن اٹ تو درست مفک، نن اصلاح نا عمل نا بناءِ کرینن۔ داخیال آتا درشانی ءِ او مانچسٹر اٹی پریس کانفرنس آن تران کرسا کرے۔ وزیر خارجہ پارے کہ اگہ نم اومیت کیرے کہ 70 سال انا بگاڑ دمدستی سہی مرے تو دُن ءُ الٰہ دین نا چراغ اس ننتون اف، ولے نن گچینی نا بناءِ کرینن، نم ہموفتیان ہم ہرفبو ہرافک گدرینگوک آ کیہی دہائی آن ملک ءِ لٹ وپل کریر و ادارہ غاتے برباد کرینو۔ اوپارے کہ حکومت اوورسیز پاکستانی تے کن بھاز انگا گام گیج آتے کرینے تانکہ اوورسیز پاکستانی تے آسانی اٹ پاکستان اٹ بزنس کننگ کیر، کشمیر نا بابت وزیر خارجہ پارے کہ مون نا حکومت آتا کشمیر آ معذرت خواہانہ رویہ اس ئس ولے 4 فروری آ برطانوی پارلیمنٹ اٹی اڈ ہلوک آ انٹرنیشنل کشمیر کانفرنس اٹی ہراامنائی قرارداد منظور مس ہرادے پاکستان نا غٹ جماعت آتا تائید دوئی ئس ہرا اسہ سفاءُ کلہو اسے۔ پاک۔ بھارت تعلقداری تا بابت وزیر خارجہ پارے کہ پاکستان و بھارت تون ہیت وگپ آن بیدس ویل آتا ہچ ءُ ایسری اس اف، نن پہہ مرینہ کہ بھارت اٹی گچین کاریک مننگ والا ءُ ہرانا سوب آن او ننتون ہیت وگپ آن کش کُنپننگ ءِ ، نن امن خوانہ ، بھارت ہراتم ہیت وگپ کن تیار مریک نن ہیت کننگ کن تیار مرینہ۔ اسہ سوج اسے نا ورندی ءِ ترسا وزیر خارجہ پارے کہ پاکستان اوغانستان تون گچین تعلقداری خواہک، نن مصالحتی عمل اٹی اونا کمک ءِ کرینن و کمک ءِ برجاتخنہ، نن اوغانستان اٹی امن خوانہ، اشرف غنی تون مسہ نشست آتے ٹی پاکستان نا واضح ءُ موقف اس پیش کرینن، نن اوغانستان اٹی امن آن پد اوغان باہوٹ آتا باعزت وڑاٹ اوفتا پدی ہِننگ ءِ خوانہ، نن اوفتے دِکہ اٹ کشپنہ، اسہ سوج اسے نا ورندی ءِ ترسا وزیر خارجہ پارے کہ پاکستان اوغانستان نا ہمسایہ ءِ ، دا اہمیت نا رداٹ امریکہ پاکستان آن کمک خواہسونے ، نن کمکاری کننگ کینہ و نن کمکاری نا کوشست ءِ کرینن ، امریکی صدر ٹرمپ اسٹیٹ آف یونین اٹی است بڈ و تعمیری گپ و تران ءِ امنا کرینے۔ بھارتی جاسوس نا بابت اسہ سوج اسے نا ورندی ءِ ترسا وزیر خارجہ پارے کہ کلبھوشن نا کیس جہانی کورٹ آف جسٹس اٹی چلینگ انگ ءِ ، 19 فروری آ پاکستانی ٹیم تینا شاہدی تے پیش کیک، دا چرجوئی ٹی ننا سخت موقف ءِ، او ننا گل زمین آن دزگیر مس، ملک اٹی اصلاحاتی عمل نا بابت آن وزیر خارجہ پارے کہ 70 سال انا بگاڑ اسہ دے اٹی سہی مننگ کپک، نن اصلاح نا عمل نا بناءِ کرینن ، و اولیکو سد دے انا پروگرام اٹی نن اصلاحاتی پروگرام اس جوڑ کرین و داسہ نن اودے عملی دروشم اس تننگ اُن۔ وزیر خارجہ پارے کہ پوسکن آ ویزہ پالیسی ٹی ہن و بر اٹی گچینی بریک، پاکستان بناؤ اوورسیز پاکستانی تے کن پرکشش زرکاری نا موقع اسے۔
