نن خارجہ پالیسی ءِ پوسکن ءِ سمت اس تسن و اینو حالیت آک گچینی نا کنڈا ہِننگ ءُ
اسلام آباد۔ 08 فروری (اے پی پی) وزیر خارجہ شاہ محمود قریشی پارینے کہ نن خارجہ پالیسی ءِ پوسکن ءُ سمت اس تسن و اینو حالیت آک گچینی نا کنڈا ہِننگ ءُ ، پوسکن آ پاکستان اٹی حکمرانی نا طرز پوسکن آ سوچ انا مریک ۔ نن الس نا شرحالی ٹی زرکاری کینہ۔ نن موٹروے تا جاگہ غا قوم سازی آ چکار کینہ و ملک اٹی پوسکن آ سیاسی کلچر ءِ درستی راستی کرفینہ۔ تدوک آ دے مانچسٹر اٹی بزنس کمیونٹی آن تران کرسا وزیر خارجہ پارے کہ پاکستان تحریک انصاف مدام پیشن نا ملک رہینگوک آ پاکستانی تے وونٹ انا حق انا ہیت ءِ کرینے تانکہ نم ملکی پالیسی تا جوڑ کننگ اٹ تینا کڑد ءِ ادا کیرے۔ اوپارے کہ ای نمے پاننگ خواوہ کہ پوسکن آ پاکستان ہرحال اٹ جوڑ مریک و داپوسکن آ پاکستانی اٹی حکمرانی نا طرز پوسکن آ سوچ انا مریک۔ نن ملک اٹی پوسکن ءُ سیاسی کلچر اس درستی راستی کرفینہ۔ اوپارے کہ ہراتم اسد عمر وزارت خزانہ نا قلمدان ءِ سنبھالا تو معاشی حالیت آک بے کچ خراب ئسر ننا کڑز آک 28 ٹریلین اسکان سرمسوسر ، برآمد آک مفننگ نا بریبر ئسر نن اول 16 وار آئی ایم ایف نا ہنان ولے او مدام سخت پابندی خلک۔ نن پاکستان نا سنگت آتا کمک ءِ ہلکن تانکہ نن آئی ایم ایف تون گچین شڑت آتیا گپ و تران کننگ کین۔ نن تینا ہمسایہ غاتون ہم امن نا ہیت ءِ کننگ اُن۔ وزیر خارجہ پارے کہ نن خارجہ پالیسی ءِ پوسکن ءُ سمت اس تسن و اینو حالیت آک گچینی نا کنڈا ہِننگ ءُ۔ سول سروس انحطاط نا گواچی ئس وہمو خلقت ہرا چاہندار ئسر چندی بشخ آتے ٹی ، موقع ملنگ آ ملک ءِ ہلارہ۔ اوپارے کہ کنے باور ءِ کہ او بتی لگک ای تہو نا رخ ءِ بدل مرسا خننگ اُٹ۔
