اسلام آباد۔ 08 فروری (اے پی پی) چیئرمین سینیٹ محمد صادق سنجرانی تون کرغستان و قازقستان نا سفیر آک جمعہ نادے آ داڑے اوڑدہی کریر و تین پہ تینی است خواہی نا معاملہ غاتیا گپ و تران و ہڑتوم آ کنڈآتا کمکاری ءِ مون آ دننگ آ امنا کریر، ہڑتوم آ سفیر آک چیئرمین سینیٹ تون پارلیمنٹ ہاؤس اٹی جتا جتا اوڑدہی کریر۔ چیئرمین سینیٹ صادق سنجرانی کرغستان نا سفیر تون گپ و تران اٹی پارے کہ ہڑتوم آ ملک آتا نیام اٹ پارلیمانی کمکاری ءِ مون آ دننگ نا گرج ءِ ۔ پاکستان و کرغستان نا پارلیمنٹ اٹی سنگتی پڑک آتے پین فعال جوڑ کننگ مریک۔ پاکستان و کرغستان جہانی فورم تا کہول آ اہم انگا جہانی معاملہ غاتا بابت اسہ وڑنا موقف اختیار کرینو۔ اوپارے کہ ہڑتوم آ ملک آتا ایشیائی پارلیمانی اسمبلی نا کہول آ کمکاری ستاکڑزک، ہڑتوم آ ملک آتا نیام اٹ واپاری کمکاری و زرکاری ٹی ودکی نا گرج ءِ، تعلیم نا بشخ اٹی ساڑی مثالی کمکاری ءِ پین سوگو کننگ مریک۔ صادق سنجرانی قازقستان نا سفیر تون گپ و تران اٹی پارے کہ پاکستان و قازقستان نا نیام اٹ برادرانہ و دوستانہ تعلقداری ننا خارجہ پالیسی نا اہم جزو ءُ۔ سینیٹ اٹی قازقستان ، پاکستان سنگتی پڑک ساڑی ءِ ہرانا کمک اٹ ہڑتوم آ ملک آتا نیام اٹ پارلیمانی تعلقداری تے پین سوگو جوڑ کننگ مریک۔ چیئرمین سینیٹ پارے کہ پاکستان و قازقستان نا نیام اٹ ایشیائی پارلیمانی اسمبلی نا کہول آ ہم گچین تعلقداریک ءُ و ہڑتوم آ ملک آک گیشتر جہانی و علاقائی معاملہ غاتیا اسہ وڑنا موقف اختیار کرینو، پاکستان و قازقستان نا نیام اٹ دفاع و ایلو بشخ آتے ٹی گیشتر کمکاری ساڑی ءِ۔ قازقستان نا صدر نا تدوک آ سال انا دورہ غان ہڑتوم آ کنڈآتا کمکاری ٹی پین ودکی مسنے۔ اوپارے کہ پارلیمانی تعلقداری تا مون آ دننگ آن معاشی و اقتصادی بشخ آتے ٹی کمکاری ٹی سوگوی بریک۔
