اسلام آباد۔ 07 فروری (اے پی پی) وزیراعظم عمران خان پارینے کہ معیشت نا سوگوی کن پیشن نا زرکاری خاص کر ٹیکنالوجی ٹرانسفر اہم ءِ، دا چرجوئی ٹی زرکار آتے ہروڑنا آسراتی تننگک۔ اوداہیت ءِ چارشنبے نادے آ ملک اٹی زرکاری نا بابت دیوان نا کماشی ءِ کرسا پارے۔ دیوان اٹی وزیر خزانہ اسد عمر، سلاہکار واپار عبدالرزاق داؤد، خصوصی کمکار نعیم الحق ، افتخار درانی ، چیئرمین بورڈ آف انویسٹمنٹ ہارون شریف، سیکرٹری خارجہ تہمینہ جنجوعہ و ایلو آفیسر آک ساڑی ئسر۔ دیوان اٹی پی ٹی آئی حکومت نا اولیکو پنچ تُو اٹی ملک اٹی مروک آ براہ راست پیشن نا زرکاری (فارن ڈائریکٹ انویسٹمنٹ ) و آخبت خڑک اٹی چندی ملک خاص کر دوست ملک آتا کنڈآن معیشت نا چندی بشخ آتے ٹی شارٹ ، میڈیم و لانگ ٹرم گمانی زرکاری نا جاچ ءِ ہلنگا۔ اسٹیٹ بینک آف پاکستان نا حساب وکتاب نا رداٹ پی ٹی آئی حکومت نا اولیکو پنچ تُو اٹی (اگست ۔دسمبر) اٹی اسہ ارب ڈالر آن ز یات نا براہ راست زرکاری کننگا۔ دانا مقابلہ ٹی مسکوہی حکومت نا دوراقتدار اٹی ہندا مد اٹی مروک آ زرکاری محض 426ملین ئس۔ پی ٹی آئی حکومت نا دور اٹی دگنی زرکاری پیشن نا دنیا نا کاروباری برادری و حکومت آتا پوسکن آ پاکستان نا حکومت و حکومت نا پالیسی تیا پت انا درشانی ءِ۔ دیوان اٹی پاکستان نا سنگت ملک آک چین، سعودی عرب، متحدہ عرب امارات، قطر و ملائیشیا نا کنڈآن داوخت اسکان کروک آ و گمانی زرکاری آ وزیراعظم ءِ بریفنگ تننگا۔ وزیراعظم ءِ بریفنگ اٹی زرکاری نا مون آ دننگ کن بورڈ آف انویسٹمنٹ نا کنڈآن کروک آ گام گیج آتا بارواٹ پاننگا۔ وزیراعظم ءِ پاننگاکہ بورڈ آف انویسٹمنٹ انڈسٹریل ءِ آپریشن یونٹ نا قیام عمل اٹی اتنگانے۔ ہاؤسنگ ، ٹورازم ، و پیشن نا ملک رہینگوک پاکستانی تے ملک انا تہٹی زرکاری کننگ اٹ کمکاری کن اسپیشل یونٹ اس جوڑ کننگانے وخت اس کہ غٹ وزارت آتے ٹی زرکاری آن تعلقدار امور کن ایڈیشنل سیکرٹری لیول نا آفیسر آتے زموار ی تننگ نا سلاہ ءِ۔
