اسلام آباد۔7فروری (اے پی پی) پاک بحریہ ءِ چیردستی ءَ امنءُ ایمنی مشق 2019جمعہ ءِ روچءَ چہ بندات بیت، مشقءَ 40ءَ چہ گیش ملک وتی بحری گرابءُ مندوبین آنی ہمرائیءَ ہوار بوہگءَ اَنت، اے مشق ءِ دو ہاسیں بھر اَنت کہ ایشی ءَ ہاربر فیز ءُ سی فیز ہوار اَنت۔ ہاربر فیز ءَ بازیں سیمینار، باست ءُ واست ءُ عملی ندارگ پیش دارگ بنت۔ ایشی ءَ ابید میاں اوستمانی تکءَ سیاست ، بحیرہ ہند ءَ چست بوہوکیں میری ٹائم ءِ سرءَ سے روچی میری ٹائم کانفرنس کنگ بیت۔ پنچ شمبے ءِ روچءَ کمانڈر پاکستان فلیٹ وائس ایڈمرل امجد خان نیازی ءَ بحری مشق امن 2019ءِ ہوالگءَ حال درءَ گوں گپ کتگءُ گشتگ کہ گوستءَ پاکستان بازیں جیڑہءُ جنجالانی آماچ بوتگ ، بلے ما ناشرکاری ءِ حلاپءَ مدام آئن ءِ ڈیوالے بوتگ اَنت۔ پاکستانءَ ناشرکاری ءِ حلاپءِ جنگءَ بازیں قربانی داتگ بلے پدا ہم گوں محکمیءَ دیما اَتکگ ۔ آئی ءَ گشتگ کہ ہمک راجءِ وڑءَ پاکستان ءِ ہم میری ٹائم سیکٹرءَ وتی پائدگ اَست اَنت۔پہ بیپارءَ ساپءُ پلگاریں زری کشک ، سی پیک ءِ بندات ءُ پاکستان ءِ توانائی ءِ ہاسیں کشکانی پہازگ اِنت۔
