وزیراعلیٰ بلوچستان جام کمال خان محکمہ پی ایچ ای ءِ غیر فعال واٹر سپلائی اسکیم تے دمدستی وڑاٹ بحال کننگ، کوئٹہ واٹر ٹریٹمنٹ پلانٹ نا فعالی ، برج عزیز ڈیم انا ڈٹ ءِ عملی دروشم اس تننگ کن گام گیج آتا بناء، میرانی ڈیم آن گوادر ءِ دیر انا فراوانی کن پیپ لین تا شاغنگ نا ڈٹ انا فزیبلیٹی رپورٹ اس تیار کننگ و واسا ءِ تینا کٹیا ٹی ودکی کننگ نا پارت
کوئٹہ۔ 07 فروری (اے پی پی) وزیراعلیٰ بلوچستان جام کمال خان محکمہ پی ایچ ای ءِ غیر فعال واٹر سپلائی اسکیم تے دمدستی وڑاٹ بحال کننگ، کوئٹہ واٹر ٹریٹمنٹ پلانٹ نا فعالی ، برج عزیز ڈیم انا ڈٹ ءِ عملی دروشم اس تننگ کن گام گیج آتا بناء، میرانی ڈیم آن گوادر ءِ دیر انا فراوانی کن پیپ لین تا شاغنگ نا ڈٹ انا فزیبلیٹی رپورٹ اس تیار کننگ و واسا ءِ تینا کٹیا ٹی ودکی کننگ نا پارت کرینے، محکمہ پبلک ہیلتھ انجینئرنگ نا بابت معاملہ غاتا جاچ دیوان نا کماشی ءِ کرسا وزیراعلیٰ محکمہ ءِ تینا شونداری ڈٹ آتا پی سی ون ءِ دمدستی وڑاٹ تیار کرسا محکمہ ڈٹ بندی و شونداری ءِ گدریفنگ نا پارت ہم کرینے، صوبائی وزیر پی ایچ ای نور محمد دمڑ ہم دیوان اٹی ساڑی ئس وخت اس کہ سیکریٹر پی ایچ ای عبدالفتح بھنگر و ایلو کمامدارآک دیوان ءِ محکمانہ معاملہ، جاری شونداری ڈٹ آتا پیش رفت و سلاہ ئی ڈٹ آتا بارواٹی احوال تسر فعال و غیر فعال واٹر اسکیم، کیسکو نا سلوک آ پیسہ غاک، فلٹر و آر او پلانٹس، گوادر ءِ دیر انا فراوانی نا ڈٹ ، مانگی ڈیم آ کاریم نا پیش رفت، بنجائی پی ایس ڈی پی ٹی اوار کننگ کن سلاہ ئی ڈٹ و برج عزیز ڈیم ڈٹ انا سرجم آک اوار ئسر وخت اس کہ ایم ڈی واسا نا کنڈآن دیوان ءِ واسا نا کارکڑدگی و ویل آتا بابت ہم احوال تننگا۔ وزیراعلیٰ پارے کہ الس ءِ کنوئی ءُ ساف دیر انا فراوانی حکومت نا اولیت آتا بشخ ءِ ہراڑکن محکمہ پبلک ہیلتھ انجینئرنگ ءِ تینا کارکڑدگی و کاریم نا کچ اٹی ودکی کروئی مریک، وزیراعلیٰ ساف دیر انا بے المی کاریم اٹ اتنگ و زیان آ گڑتی نا درشانی ءِ کرسا پارے کہ الس ءِ دیر انا بچت و واسا نا بل تا تننگ نا شعور اس تالان کننگے، او صوبہ نا چندی علاقہ غاتے ٹی ڈیم تا جوڑ کننگ کن سروے کننگ، بھاگ اٹی دیر انا ویل انا ایسری کن ٹھوس بنداو تیا گام گیج کننگ، کچھی پلین واٹر پروجیکٹ فیزII انا دمدستی پوروی و گوادر اٹی کارواٹ ڈی سیلینیشن پلانٹ نا فعالی نا ڈٹ انا معاہدہ ءِ زوت آن زوت گڈیکو دروشم اس تننگ نا پارت ہم کرے، او پارے کہ کوئٹہ واٹر ٹریٹمنٹ پلانٹ نا فعالی آن جوڑجاڑی کاریم، پارک و سروس اسٹیشن تے کن دیر دستیاب مننگ کیک ہراڑان داکاریم تے کن کاریم اٹ اتوک آ ساف دیر انا بچت مریک، وزیراعلیٰ واسا ءِ دیر انا بل تا نظام ءِ گچین جوڑکرسا کٹیا ٹی ودکی کننگ نا پارت کرے ، اووزیراعلیٰ سیکرٹریٹ ، سول سیکرٹریٹ، گورنر ہاؤس و ایلو سرکاری دفتر آتیان ہم میٹر خلسا دیر انا بل تا ہلنگ نا پارت کرے۔
