اسلام آباد۔ 07 فروری(اے پی پی) بنجائی کابینہ شہباز شریف نا کنڈآن چیئرمین پی اے سی نا عہدہ ءِ وڈی خوری نا مقدمہ غاتا برخلاف ڈھال انا وڑاٹ کاریم اٹ اتنگ آ گڑتی نا درشانی ءِ کرینے، اخلاقی وڑاٹ شہباز شریف ءِ چیئرمین پی اے سی نا عہدہ غان بایدے استیفہ تروئی مرے، بنجائی کابینہ تدوک آ اِرا تُو اٹی سوئی گیس نا اووربلنگ آ ایکسٹرنل آڈٹ، عبدالرحمان وڑائچ ءِ ڈیٹ پالیسی آفس نا ڈائریکٹر جنرل ، آڈٹ اوور سائیڈ بورڈ انا اول سرآن ٹہیفنگ و طارق خان ءِ بورڈ انا سروک پن، سید وقار الحسن ءِ ایم ڈی پی ٹی ڈی سی نا مسہ تُو اکن ودکی چارج تننگ نا منظوری وخت اس کہ کرتارپور راہداری ٹی ڈویلپمنٹ معاملہ غاتا چاروکی کن گورنر پنجاب نا سرکڑدہ ہی و ہردے ئی المی گڑاو اجناس نا نہاد آتے ٹی سوگوی اتنگ کن وزیر دفاع پرویز خٹک نا سرکڑدہ ہی ٹی خصوصی کمیٹی جوڑ کرینے، وزیراعظم عمران خان سی ڈی اے آن بنجائی دارالحکومت نا ماڑی تے ٹی معذور بندغ آتا رسینگ ءِ المی جوڑ کننگ کن گام گیج آتا بارواٹ رپورٹ اس بٹنگانے۔ وزیراعظم عمران خان فاٹا نا علاقہ غاتے کن عملی گام گیج آتے ترند کننگ آ زور شاغا، عدلیہ پورو آجو، حکومت و فوج انا نیام اٹ تاریخ نا گچین کوآرڈینیشن ءِ و برجاسلک۔ پنچ شنبے نادے آ بنجائی وزیر اطلاعات و نشریات چوہدری فواد حسین وزیراعظم عمران خان نا کماشی ٹی کابینہ نا دیوان آن پد میڈیا ءِ بریفنگ ترسا پارے کہ بنجائی کابینہ چیئرمین پی اے سی نا عہدہ ءِ شہباز شریف نا کنڈآن تینا کیس آتے ٹی ڈھال انا وڑاٹ کاریم اٹ اتنگ آ سخت ناپسندیدگی نا درشانی ءِ کرینے، شہباز شریف ہراوخت آن پی اے سی نا چیئرمین مسنے او تینا دفتر نا کمک اٹ نیب کیس آتا جاست وپاست آن بچنگ ءِ ، داخہ بھلو کرپشن اسے نا باوجود شہباز شریف اسلام آباد اٹی ساڑی ءِ و داسہ کوشست کننگ انگ ءِ کہ سعد رفیق ءِ پی اے سی نا باسک کرسا اوڑکن ہردے پروڈکشن آرڈر دوئی کننگ مرے، دا مچ آ حالیت آتیا شہباز شریفءِ بایدے مرے کہ اخلاقی وڑاٹ چیئرمین پی اے سی نا عہدہ آن جتا مرے ۔ اوپارے کہ ادارہ شماریات نا کنڈآن بنجائی کابینہ ءِ ہردے نا گڑا و غلہ غاتا نہاد آتے ٹی کمتی و ودکی نا بابت سرجم احوال تننگانے۔ ادارہ شماریات بنجائی کابینہ ءِ پارے کہ ادارہ 8 ہزار، 12ہزار، 18 ہزار، 26ہزار ، 35ہزار، 39 ہزار، 77 ہزار و 77 ہزار آن زیات ماہانہ کٹیا نا پڑک جوڑ کرینے و ہندا بنداو آ دا پڑک آتا جتا جتا ہردے رپورٹس تیار مریک۔ ادارہ شماریات پارے کہ نومبر 2013ء ٹی مسلم لیگ(ن) نا حکومت نا اولیکو 6تُو اتی کبینی ٹی 5.8 درسد ودکی مسوسس وخت اس کہ 2018 ء ٹی پی ٹی آئی نا حکومت نا اولیکو 6 تُو اٹی کبینی ٹی 1.4 درسد ودکی مسنے، دا نیام اٹی چکن نا نہاد اٹی 18.85درسد کمتی، توم انا نہاد اٹی 29.1 درسد، پیماز نا نہاد اٹی 51.42درسد چڑیانا نہاد اٹی 29 درسد و ایلو دال تا نہاد آتے ٹی ہم کمتی مسنے وخت اس کہ ٹماٹر نا نہاد اٹی 50.60 درسد ودکی، سیمنٹ نا نہاد اٹی 14.6درسد ودکی، ڈیزل نا نہاد اٹی 18.65درسد ودکی، بجلی نا نہاد اٹی 8.48درسد، مٹن نا نہاد اٹی 12.4 درسد، چاہ نا نہاد اٹی 17.29 درسد ودکی مسنے، حکومت نا ساڑی گام گیج آتا سوب داسہ خوائے و ایلو اجناس آتا نہاد آتے ٹی کمتی نا سفر بناکرینے ، وزیراعظم عمران خان ہردے انا المی آ گڑاتا نہاد آتے ٹی سوگوی کن وزیر دفاع پرویز خٹک نا سرکڑدہ ہی ٹی کمیٹی اس جوڑ کرینے، دا کمیٹی ادارہ شماریات تون اواری اٹ شماریات نا فارمولہ نا اول سرآن جاچ ءِ ہلنگ کیک وخت اس کہ صارف آتا آسراتی کن نہاد آتا بابت موبائل ایپ اس ہم درستی راستی کرفنگ انگ ءِ، اوپارے کہ بنجائی کابینہ سوئی گیس انا بل آتے ٹی ودکی نا معاملہ غا ہم سجفینے، کابینہ فیصلہ کرینے کہ تدوک آ اِرا تُو اٹی مروک آ بلنگ نا ایکسٹرنل آڈٹ ءِ کننگک و سوئی گیس انا مقررہ سلیپز آتا جاچ ءِ ہم ہلنگک۔ مسکوہی وزیراعظم شاہد خاقان عباسی نا مہربانی اٹ نن کبین ایل این جی ہلسا الس ءِ اڑزان ایل این جی تننگ اُن۔ اوپارے کہ وزیراعظم وزیر ہاؤسنگ اینڈ ورکس ءِ پارت کرے کہ او اسلا م آباد اٹی وزراء انکلیو تون اوار سرکاری ہنکین تیا غیر کانودی کوزہ غاتا برخلاف بے پرخ کارروائی کرسا کوزہ غاتے پدی ہلنگے۔
