وزیراعظم نا خصوصی کمکار سمندر پار پاکستانیز ذوالفقار عباس بخاری نا ’’اے پی پی‘‘ تون گپ و تران

اسلام آباد۔ 07 فروری (اے پی پی) وزارت اوورسیز پیشن نا ملک آتیا ہنوک آ خواری کش آتے بائیو میٹرک سسٹم تون گنڈسا ایجنٹ آتا کنڈآن اوفتا استحصال ءِ چٹفینے، پیشن نا ملک آ ہنوک آ غٹ خواری کش آتا پورو ڈیٹا داسہ وزارت تون ساڑی مریک۔ داخیال آتا درشانی ءِ وزیراعظم نا خصوصی کمکار سمندر پار پاکستانیز ذوالفقار عباس بخاری ’’اے پی پی‘‘ تون گپ و تران کرسا کرے۔ اوپارے کہ ہراوخت آن نن پیشن نا ملک آ ہنوک آ خواری کش آتے کن بائیو میٹرک نا سسٹم نا بنا ءِ کرینن تو داڑان بھاز گچینی بسنے انتئے کہ دا سسٹم اٹی ہر گڑا نا ٹریکنگ ءِ کننگک۔ مہالو نن تون ہچ کس نا ہچ ءُ ڈیٹا اس الوکہ ، اینو نا دور اٹی ڈیٹا بھاز اہمیت تخک، ایلو ملک آک ڈیٹا دوئی کننگ کن ارب آ روپئی تے خڑچ کیرہ، ڈیٹا سسٹم نا کمک اٹ ورکرز و اوفتا خاہوت آتا پورو سرجم آتسکان ننا رسینگ ءِ کہ ورکر اس ہراوخت و ہرانگیا ہنا و اونا خاہوت ہراڑے رہینگ انگ ءِ، اونا ترسیلات زر ملک اٹی اخس بننگ ءِ۔ خصوصی کمکار پارے کہ ہراتم معاملہ غاتیٹی شفافیت بریک تو ایجنٹ آتا کڑد کم مریک، ایجنٹ آک خلقت نا ہمو وخت آ استحصال ءِ کیرہ ہراتم اوفتے تون ہچ ءُ کاریم اسے نا معلومداری مفک ۔ پیشن آ ہنوک آ ورکرآتے تینا حق انا اخہ در معلوم مریک اوڑان او تینا استحصال آن بچنگ کیرہ۔