اسلام آباد/لندن۔ 07 فروری (اے پی پی) وزیر خارجہ مخدوم شاہ محمود قریشی پارینے کہ برطانوی پارلیمنٹ اٹی مظلوم کشمیری تا حق اٹی امنائی قرارداد نا منظوری و اوفتیا مروک آ بیدادی نا برخلاف ہراتوار بڑز مس او تاریخ نا بشخ اسے، بھارت تینے اخس کہ چائے ڈکے سوشل میڈیا اودے بے نقاب کیک، پاکستان و چین نا نیام اٹ سی پیک پارٹ ٹو انا فیصلہ مسنے، پنچ تُو اٹی سعودی عرب ، یو اے ای و قطر ننتون بھاز بھلو کمک اس کریر، اینو امریکہ نا سوب آن طالبان تتون مذاکرات کننگ ءِ، عزت نا روزگار اس پٹنگ ملک ملک آتیا چرینگوک آ پاکستانی تے داسہ ملک انا تہٹی روزگار دوبریک، مسکوہی حکمرانی تا نظر واشنگٹن آ مسکہ، ننا مدینہ غاٹی ءِ ، پی ٹی آئی نا حکومت دے ٹکی نا آشیرباد آن آخا 22سال انا پدریسہ جہد آن بسنے۔ داخیال آتا درشانی ءِ او پی ٹی آئی برطانیہ نا ورکرز کنونشن آن تران کرسا کرے۔ اوپارے کہ برمنگھم نا خلقت ہراوڑاٹ کنے بخیر کریر اودے مدام یات سلک۔ آل پارٹیز پارلیمانی پڑک پٹ وپول و شاہدی یکجا کننگ آن پد 30اکتوبر آ ہرارپورٹ ءِ شینک کرے او ہمو ئس ہرا پاکستان سال سال آن پارسا بننگ ءِ۔ اوپارے کہ 2018 ء جون اٹی اقوام متحدہ نا ہیومن رائٹس کمیشن نا رپورٹ شینک مریک ہرا مقبوضہ جموں و کشمیر اٹی بھارت نا کنڈآن انسانی حق آتا خلاف ورزی تے تالان کیک۔ دااِرا رپورٹ آتیان پد ننا حکومت فیصلہ کرے کہ نن تحریک انصاف اُن و ننے چپی ءِ پرغوئی ءِ، مظلوم آتون توار چست کروئی ءِ۔ نن خلقت دیکی نا آشیرباد آن 22سال نا پدریسہ جہد آن اقتدار اٹی بسونن۔ ننے پاننگاکہ کہ نن تون سرکڑدہ اف اینو ای نمے غٹ ءِ مبارکبادی ایتیوہ کہ مزل خڑک ءِ کنا مزل وزارت خارجہ نا کڑسی اف بلکن پوسکن آ پاکستان ءِ۔ اوپارے کہ ہرا حال اٹی پاکستان نا دُدینگ ءِ عمران خان ءِ تننگا او نما غٹ انا مون آٹی ءِ ، نم ستاکڑزرے کہ نم وطن تون مابت کیرے و داڑے کٹیا کیرے و 22 ارب ڈالر پاکستان آ گدریفرے نم تینا کڑد اٹ ثابت کریرے کہ نم افضل ءُ پاکستانی اورے۔ ای 4 فروری آ برطانوی پارلیمنٹ نا ہاؤس آف کامنز اٹی ہراچاگڑد ءِ خناٹ او غیر معمولی ئس۔ ای پاکستان نا غٹ سیاسی جماعت آتا پارلیمنٹرینز آتا منت وار اُٹ ہرافک دا قرارداد ءِ پک کریر۔ اوپارے کہ دا کلہو او کشمیری تسکان سرمسنے و ہموکان اخس کہ حریت سرکڑدہ غاک ءُ اوفک’’مرحبا‘‘ پاریر۔ ای برطانیہ نا کشمیری تے 4 فروری آ قرارداد آ مبارکباد پیش کیوہ۔ 5 فروری آ پارلیمنٹ سکوائر نامون آ ہرا ہزار آ خلقت مظلوم کشمیری تتون یکجہتی نا درشانی کن جمع مسر تو غٹ ءِ کلہو تسر کہ برطانیہ نا پاکستانی و کشمیری تا ضمیر زندہ ءِ۔ وزیر خارجہ پارے کہ ای لندن اٹی رہینگوک آ پاکستانی تا منت وار اُٹ کہ نم داوخت آ عمران خان تون تفیرے ہراتم ننے اسہ سیٹ اس ملک نم شوکت خانم ءِ سلفیرے ۔ نمے وونٹ انا حق ترفنگ کن ہراتم تحریک انصاف بیڑا ءِ ہرفے تو گڑاس خلقت مخالفت کریر انتئے کہ اوفتے سمائس کہ اگہ پیشن نا ملک رہینگوک آ پاکستانی تے وونٹ انا حق ملا تو دا وونٹ تحریک انصاف ءِ ملک ولے نن عدالت آتا درگہ غا ہنان و نما حق ءِ نمے ترفین۔ اوپارے کہ ای ہمو پاکستانی تے سلام پیش کیوہ ہرا خورک جیب بسر و تینا خواری اٹ کروڑ آ ارب پبی مسر۔ ای اوفتے سلام پیش کیوہ ہرافک ننتون دیر انا کمتی ءِ محسوس کریر ہراہرافک محسوس کریر کہ ننا 90 درسد دیر کشت وکشار کن خڑچ مریک ننا ریزروائر کم مننگ ءِ و دا پردیسیک ننا توار آ لبیک پاریر و پاریر کہ نن ڈیم جوڑ کینہ۔ اوپارے کہ اینو کنے سیاست اٹی 33 سال مسنے نن عملی سیاست کرینن کنا سیاسی آ خن اسہ پوسکن ءُ دے اس دے ٹک ترسا خننگ ءِ۔
