اسلام آباد۔ 07 فروری (اے پی پی) صدر مملکت ڈاکٹر عارف علوی پارینے کہ آجومیڈیا شون ہلوک آراج آتا نہادی ءُ جزو اسے ، آجوئی تون اوار اوار میڈیا نا زموار مننگ ہم بے کچ المی ءِ، جندی پسند و ناپسند فطری ءُ عمل اسے ولے داصحافت اٹی بایدے مف۔ داخیال آتا درشانی ءِ او پنچ شنبے نادے آ داڑے آل پاکستان نیوز پیپرز اینڈ ایڈیٹر ز فورم (اے پی این ای ایف)و پاکستان جرنلسٹ فورم (پی جے ایف) نا ڈل اتون اوڑدہی ٹی کرے۔ صدر مملکت پارے کہ ہچ ءُ حکومتی نظام اس خراب اف ۔ شرط دادے کہ گورننس گچین و شفاف مرے۔ اوپارے کہ میڈیا گچین مہم آتا کمک اٹ بروک آ دور انا خدوخال ءِ جوڑ کننگ کیک۔ اوپارے کہ پاکستانی میڈیا ، بھارتی میڈیا غان جوان و آجوئی اٹ تینا زمواری تے پورو کننگ ءِ۔ ڈاکٹر عارف علوی پارے کہ غلطی نا حالیت اٹ زموار میڈیا تینا اصلاح ءِ تینٹ کیک۔ صدر مملکت پارے کہ ملک گچینی نا کنڈا راہی روان ءِ ، نن بے مٹ قربانی و سیوت اٹ دہشت گردی نا بھلو حد اسسکان مون ءِ تورینن۔ اوداہیت آ زور شاغا کہ دہشت گردی ٹی شہید مروک آ شاری تیکن انشورنس نا نظام اس بایدے مرے۔ اوپارے کہ زالکار نا حق انا فراوانی راجی شونداری کن بے کچ المی ءِ، زالکار نا حق انا فراوانی ٹی میڈیا تینا کڑد ءِ ادا کے۔ صدر پی جے ایف ذوالفقار راحت صدر مملکت ءِ صحافی تا تربیت و شرحالی نا گام گیج و ڈٹ آتیان معلومدار کرے۔ ذوالفقار راحت و رانا عمران لطیف صدر مملکت ءِ شیلڈ اس ہم پیش کریر۔
