پاکستان و چین نا نیام اٹ پوسکن آ قمری سال اٹی تعلیم ، انفارمیشن ٹیکنالوجی و کشت وکشار نا بشخ آتے ٹی تعلقداریک پین سوگو مریرہ
اسلام آباد ۔ 06 فروری (اے پی پی) چین اٹی پاکستان نا سفیر مسعود خالد پارینے کہ پاکستان و چین نا نیام اٹ پوسکن آ قمری سال اٹی تعلیم، انفارمیشن ٹیکنالوجی و کشت و کشار نا بشخ آتے ٹی تعلقداریک پین سوگو مریرہ۔ چارشنبے نادے آ تینا اسہ انٹرویو اسے ٹی او پارے کہ سال 2019 ءِ سرکاری وڑاٹ پاک چین سنگتی نا سال گوندنگانے و داخصوصی موقع ءِ اڈتننگ نا غرض اٹ رنگ رنگی دود آتا بست وبند ءِ کننگانے۔ مسعود خالد دا پکا عزم انا اعادہ ءِ کرے کہ پاکستان و چین نا نیام اٹ پوسکن آ قمری سال اٹی مثبت پیش رفت برجاسلک۔ اوپوسکن آ سال انا وخت آ چینی الس کن نیک است خواہی نا درشانی ءِ ہم کرے۔ اوپارے کہ گدرینگوک آ ہفتاد سال اٹی پاک چین تعلقداری تین پہ تینی پت و عزت و شرف نا سوگو بنداو تیا استوار مسنو و ہڑتوم آ کنڈآتا دوستانہ تعلقداریک پین زیات مریرہ ۔ اوپارے کہ پاکستان ون بیلٹ ون روڈ انا ایلو اہم سرجزکون آ انٹرنیشنل کوآپریشن سمٹ، ورلڈ ہارٹیکلچرل ایکسپوزیشن و چائنا انٹرنیشنل امپورٹ ایکسپو ٹی پبی بشخ ہلیک۔
