اسلام آباد۔ 06 فروری (اے پی پی) روسی کمپنی پاکستان اٹی تیل و گیس انا بشخ اٹی زرکاری کیک، انٹراسٹیٹ گیس سسٹم و گاز پروم کمپنی ٹی معاہدہ پک مس۔ چارشنبے نادے آ پٹرولیم ڈویژن اٹی روسی ڈل بنجائی وزیر پٹرولیم غلام سرور خان تون اوڑدہی کرے ہراٹی پاکستان و روس انا نیام اٹ تیل و گیس انا پٹنگ و پیدوار نا بابت معاملہ غاتیا شرہ مس۔ داوخت آ روسی ڈل اٹی اوار گاز پروم کمپنی نا سروک ویٹیلی اے مرکالوف و انٹر اسٹیٹ گیس سسٹم پاکستان نا منیجنگ ڈائریکٹر مبین صولت انٹر کار پوریٹ ایگریمنٹ آ دستخط کریر ۔ معاہدہ نا رداٹ روسی کمپنی گازپروم پاکستان اٹی تیل و گیس انا پٹنگ و پیدوار نا بشخ اٹی زرکاری کیک ۔ بنجائی وزیر پٹرولیم و قدرتی وسیلہ غلام سرور خان روس انا پاکستان اٹی تیل و گیس انا بشخ اٹی زرکاری ٹی است خواہی ءِ خوش آئند گوندسا پارے کہ معاہدہ پاکستان و روس انا نیام اٹ تین پہ تینی کمک ءِ مون آ دننگ نا آئینہ دار ءِ۔ یات سلے کہ دا معاہدہ نا رداٹ روسی کمپنی دے ٹک نیامی آن گیس پیپ لین انا کمک اٹ پاکستان آ اتیک۔ داکان بیدس روسی کمپنی پاکستان اٹی گیس انا ڈغار نا تہٹی سٹوریج نا بابت آسراتی تننگ اٹی ہم است خواہی تخک۔ پٹرولیم ڈویژن نا شعبہ تعلقات عامہ نا رداٹ دا معاہدہ نا رداٹ روس پاکستان ءِ ہردے 500 ملین آن اسہ بلین کیوبک فٹ گیس فراوان کیک ہرا سمندری کسر آن پاکستان آ سرکننگک وخت اس کہ پیپ لین نا جوڑ کننگ بروک آ 3 آن 4سال اٹی پورو کننگک۔ روسی ڈل ڈٹ انا پوروی ٹی پبی کمک و کمکاری فراوان کننگ آ بنجائی وزیر پٹرولیم غلام سرور خان نا منت واری ءِ ہرفسا پارے کہ روس پاکستان نا انرجی سیکٹر اٹی کمکاری ءِ برجاتخک۔ روسی ڈل انا سروک ویٹیلی اے مرکالوف بنجائی وزیر پٹرولیم غلا سرور خان ءِ روس انا دورہ کننگ نا سلہ خلکونے ہرادے امنا کرسا غلام سرور خان خیر سگالی نا جوزہ نا ستاءِ کرے۔
