سلاہ غا تا تیاری کن 6 ذیلی پڑک اس جوڑ
اسلام آباد۔ 06 فروری (اے پی پی) نہہ می قومی مالیاتی کمیشن (این ایف سی) نا دیوان اس بنجائی وزیر خزانہ اسد عمر نا کماشی ٹی مس، دیوان اٹی سلاہ غاتا تیاری کن 6ذیلی پڑک اس جوڑ کننگانے، دا پڑک فاٹانا بابت امور، واپار اٹی آسانی، مائیکرو اکنامک نا معاملہ و فنڈ آتا گدریفنگ نا بابتءِ۔ این ایف سی دیوان اٹی بنجائی و صوبائی حکومت آتا نیام اٹ پورو حساب وکتاب نا ہل و تس انا گرج آ زور شاغنگانے۔ دیوان اٹی فیصلہ کننگانے کہ پین وخت اس ہر 6ہفتہ ٹی این ایف سی نا دیوان اس اڈ ہلیک۔ دیوان اٹی بشخ ہلوک آ داہیت آ امنا کریر کہ فنڈ آتا بشخ وپانٹ 18می آئینی ترمیم نا بایدے حقی عکاس مرے۔ دیوان اٹی دا فیصلہ ہم کننگاکہ چندی معاملہ غاتیا گچین رابطہ کاری کن وزارت خزانہ ٹی این ایف سی سیکرٹریٹ ءِ پین سوگو کننگک۔ دیوان اٹی بنجائی سیکرٹری خزانہ ملکی مالیاتی حالیت آتا بارواٹ سرجم پریزنٹیشن تس۔ داکان بیدس پنجاب، سندھ، خیبر پختونخوا و بلوچستان نا سیکرٹریز خزانہ تینا تینا صوبہ غاتا مالیاتی معاملہ غاتا بارواٹ دیوان ءِ معلومدار کریر۔
