وزیر خارجہ شاہ محمود قریشی نا مقبوضہ کشمیر اٹی انسانی حق انا خلاف ورزی تا بابت لندن اٹی اڈ ہلوک آ نمائش آن تران

اسلام آباد۔ 06 فروری (اے پی پی) وزیر خارجہ شاہ محمود قریشی پارے کہ بھارتی بیدادی نا ہچ ءُ چمبازی اس کشمیری تا آجوئی نا جوزہ ءِ یخ کننگ کپک، بھارت نا است ہسون بیدادی آ جہانی برادری نا چُپی آ مہذب دنیا ءِ سجفوئی مریک، بھارتی فوج ءِ مون انگا کانود نا کمک اٹ کشمیری تا خون ءِ کننگ نا لیسن تننگانے، بھارت اسہ کارندہ اسے جنگی ڈوہ و است ہسون بیدادی آ سزا تتنے، مقبوضہ کشمیر اٹی انسانی حق آتا لتاڑآتے ہُننگ کن آزاد جاست وپاستی کمیشن اس ٹہیفنگ المی ءِ، مقبوضہ جموں و کشمیر اٹی انسانی حق انا خلاف ورزی تا جاست وپاست ءِ کرفنگے۔ وزیر خارجہ مقبوضہ جموں وکشمیر اٹی انسانی حق انا خلاف ورزی تابابت لندن اٹی اڈ ہلوک آ نمائش آن تران کرسا پارے کہ اینو نن غٹ داڑے مقبوضہ جموں و کشمیر نا جیرت مند و بہادر کشمیری تا حوصلہ ءِ سلام پیش کننگ کن مچ مسونن، نن کشمیر نا شہید آتا قربانی تے سلام عقیدت پیش کینہ، شہید آتا خاہوت ، چناو وارث آتا غم اٹی بریبر نا شریک اُن و اوفتا دوست آتے کن انصاف نا دوئی کننگ نا خواست اٹی ننا توار ہم اوار ءِ۔ اوپارے کہ پاکستانی سینیٹ نا باسک آک ہم اینو کشمیری تتون یک جہتی کن داڑے ساڑی ءُ، مقبوضہ جموں و کشمیر اٹی کودک و بے گناہ الس کوزہ گر بھارتی فوج انا بدترین بیدادی تا نشانہ جوڑ مننگ ءُ۔ عکسی نمائش نا بابت اوپارے کہ دا عکس آک بھارتی بیدادی و بربریت نا شاہدی اسے ءُ۔ اوپارے کہ مقبوضہ وادی ٹی پیلٹ گن آتے کاریم اٹ اتسا کشمیری تے بصارت آن محروم کننگ انگ ءِ، ہزار آبندغ آتا شہید مننگ آن بیدس بھلو کچ اسے ٹی خلقت نابینا و معذور مسر ہرافتے ٹی چناو زالبول آک ہم اوار ءُ۔ وزیر خارجہ پارے کہ بھارتی فوجیک پیلٹ گن آتے مہلک سلہہ سمجھپسہ و بے دریغ کودک الس نا برخلاف کاریم اٹ اتنگ ءُ، کٹھوعہ نا ہشت سالہ کودک آصفہ بانو ءِ دیر اس است آن دننگ کیک ہرادے برمتہ کرسا اجتماعی بے حرمتی نا نشانہ کننگا و بے رحمی اٹ اونا خون ءِ کننگا، بھارتی بے رحمی نا اسہ مثال اسے ہرانا پد پشت ڈوہ تا پورو سمندراس اودیم ءِ۔ اوپارے کہ پاکستان خواست کرسا بننگ ءِ کہ مقبوضہ جموں و کشمیر اٹی انسانی حق انا خلاف ورزی تا جاست وپاست ءِ کرفنگے۔ یو این انسانی حق اکن ہائی کمشنر نا رپورٹ مقبوضہ وادی ٹی انسانی حق انا خلاف ورزی تے پک کرینے۔ انسانی حق اکن یو این ہائی کمشنر نا رپورٹ مقبوضہ وادی ٹی انسانی حق انا خلاف ورزی تے کن جاست وپاستی کمیشن اس ٹہیفنگ نا خواست کرینے۔ وزیر خارجہ پارے کہ استصواب رائے نا حق ءِ تننگ نا وعدہ کشمیری تتون تینٹ اقوام متحدہ تینا قرارداد آتا کمک اٹ کرینے، بھارت اقوام متحدہ نا قرارداد آتا کمک اٹ کشمیری تے استصواب رائے نا حق تننگ نا وعدہ کریسس، بھارت تینا رویہ غان ثابت کرینے کہ او دا وعدہ ءِ پورو کننگ نا ارادہ تخپک۔ شاہ محمود قریشی پارے کہ بھارتی فوج تحریک آجوئی ءِ لتاڑنگ کن جنسی بیدادی ءِ ظلم انا چمبازی تا وڑاٹ کاریم اٹ اتنگ ءِ۔ کنن پوش پورہ نا حلق اٹی تئیس فروری 1991ء نا یخ انگا نن اٹ ہراظلم مس ، کشمیری الس اینو اسکان اودے گیرام کننگ کتنو۔ نومبر 2018 ء ٹی شوپیاں نا علاقہ ٹی بیست تُو انا موصومہ حبا ءِ پیلٹ گن اٹ نشانہ کننگا۔داکان مست وزیر خارجہ یوم یکجہتی کشمیر نا بابت اسہ عکسی نمائش اسے نا بناءِ کرے۔ برطانوی باسک پارلیمنٹ عمران حسین و چیئرپرسن ورلڈ کانگریس اوورسیز پاکستانیز ناہید رندھاوااسیجا وڑاٹ نمائش نا بست و بند ءِ کریر۔ نمائش اٹی برطانوی پارلیمنٹرینز ، لوکل گورنمنٹ میئرز، کونسلرز ، سول سوسائٹی نا باسک آک، طالب علم و برٹش پاکستانی تا بھلو کچ اس ساڑی ئسر۔ لندن اٹی پاکستانی ہائی کمشنر محمد نفیس زکریا ہم داوخت آ تران کرسا کشمیر نا ویل ءِ پرامن ایسری نا گرج آ زور شاغا۔ صدر آزاد کشمیر سردار مسعود خان جہانی برادری آ زور شاغاکہ او مظلوم کشمیری تے کن توار بڑز کے۔ دود آن برطانوی پارلیمنٹ نا باسک عمران حسین، لارڈ قربان حسین، ڈیبی ابراہیم تون اوار ناہید رندھا وا، بیرسٹر سلطان محمود و چوہدری یاسین ئسک ہم تتران کریر۔