اسلام آباد/لاہور۔ 06 فروری (اے پی پی) قومی احتساب بیورو (نیب) پنجاب نا سینئر صوبائی وزیر علیم خان ءِ کٹیا غان زیات میرات جوڑ کننگ نا دوبہ ٹی دزگیر کرینے۔ نیب انا کنڈآن چارشنبے نا دے آ جاری پریس ریلیز نا رداٹ دزگیری آن پد علیم خان ءِ کانود نا رداٹ (اینو) پنچ شنبے نادے آ احتساب عدالت لاہور اٹی ریمانڈ اکن پیش کننگک۔ داکان بیدس قومی احتساب بیورو (نیب) لاہور نا کنڈآن جاری بیان اٹی پاننگانے کہ سینئر صوبائی وزیر عبدالعلیم خان ءِ آف شور کمپنی کیس اٹی دزگیر کننگانے۔ اودے چارشنبے نادے آ آف شور کمپنیز اسکینڈل و مبینہ کٹیا غان زیات میرات جاٹ کیس اٹی جاری انکوائری آ بیان اکن جندی حیثیت اٹ بٹنگ انگاسس۔ دوبہ دار نا برخلاف کٹیا غان زیات میرات و آف شور کمپنیز تا ٹہیفنگ و پیسہ غاتا گدریفنگ نا بابت جاری جاست وپاست اٹی نیب ٹیم ءِ شاہدی تا بابت است جم کپننگ آ علیم خان ءِ دزگیر کننگانے۔ بیان اٹی ڈی جی نیب لاہور شہزاد سلیم پارے کہ نیب گچین قومی فائدہ غاتے مون آ تخسا گام گیج آتے سرانجام تننگ ءِ ہراٹی ’’پسند ناپسند‘‘ نا تصور اف۔ اوپارے کہ چیئرمین نیب انا ویژن نا رداٹ کرپٹ عنصر آتا برخلاف بے پرخ کارروائیک برجاسلرہ۔ شہزاد سلیم پارے کہ غٹ میگاکرپشن مقدمہ غاتا انتہاء شفافیت و میرٹ نا بنداو آ جاست وپاست جاری ءِ ہرافتے زوت آن زوت ایسر اسکان سرکننگ کن سرگرداں ءِ۔
