کوئٹہ۔ 06 فروری (اے پی پی) ڈپٹی اسپیکر قومی اسمبلی قاسم خان سوری پارینے کہ وزیراعظم عمران خان نا سرکڑدہ ہی ٹی بلوچستان ءِ شونداری نا کسر آ روان کرسا ایلو صوبہ غاتا بریبر اتینہ، ای تینا گچین کاری حلقہ کوئٹہ شار انا تعلیمی ادارہ، ہسپتال و دیر انا ویل آتے کن بنجائی وزیر آتون اوار غٹ کمامدارآتون پدریسہ رابطہ ٹی اُٹ، کوئٹہ نا شاری تا پت آ پورو سلنگ کن ہروڑنا گام گیج چست کننگ اُن، داہیت ءِ او کلی دیبہ ٹی پاکستان تحریک انصاف نا راہشون بسم اللہ آغا نا ہنکین آ اڈ ہلوک آ مچی آن تران کرسا کرے۔ ڈپٹی اسپیکر قاسم خان سوری پارے کہ بنجائی حکومت الس نا خذمت و اوفتا متکن آ ویل آتے ایسر کننگ نا باور کیک، مون نا حکومت آتا غلط گام گیج آتا سوب آن ملک انا اقتصادی حالیت پین وڑءُ ولے وزیراعظم عمران خان نا مثبت سوچ و ویژن نا سوب بھاز زوت پاکستان نا اقتصادی حالیت گچین مریک و دارداٹ سنگت ملک آک پبی کمکاری نا باوری ترفینو۔ اوپارے کہ کوئٹہ نا شاری تا خواست آ بنجائی کابینہ نا اولیکو وار کوئٹہ غان حاجی تے کن براہ راست جہاز چلیفنگ نا فیصلہ اس کرینے ہراڑان بلوچستان نا حاجی تے کن حج انا فرض ءِ پورو کننگ اٹ آسانی مننگ تون اوار اوار وخت ہم بچک۔
