اسلام آباد۔ 04 فروری (اے پی پی) بنجائی وزیر جا ن جوڑی عامر محمود کیانی پارینے کہ نن اینو دا ملک انا الس کن جان جوڑی نا کلہو اس ایسونن و بنجائی دارالحکومت آن جان جوڑی نا دا انقلابی پروگرام نا بناءِ کننگ اُن، ننا عزم ءِ کہ جان جوڑی نا بریبر آسراتی تا فراوانی آن بیدس ہچ ءُ قوم اس شون ہلنگ کپک ہنداخاطران وزیراعظم نا وژن نا رداٹ جان جوڑی نا بشخ اٹی اہم گام گیج کننگ انگ ءِ ۔ دا ہیت ءِ او اسلام آباد اٹی جان جوڑی آسراتی پروگرام نا بنائی دود آن تران کرسا پارے۔ اوپارے کہ دا پروگرام ہرا اینو اسلام آباد اٹی بنا کننگ انگ ءِ مچ آ دنیا ٹی تینا وڑ انا اسٹ انگا پروگرام ءِ۔ دا پروگرام نا رداٹ مچ آ پاکستان اٹی 1.5 کروڑ خاہوت جان جوڑی نا آسراتی تے کاریم اٹ اتیرہ ۔ اسلام آباد اٹی 85,000 نیزگار خاہوت آتے دا آسراتی دو بریک وخت اس کہ فاٹا نا ہر خاہوت ءِ جان جوڑی انصاف کارڈ ایتنہ۔ دا پروگرام لس ناجوڑی تا داخلی درمان بشمول چناتا ناجوڑی، زچگی ، سرجیکل و ایلو ناجوڑی تے کور کیک ہرافتا خڑچ 120,000 روپئی فی خاہوت سالانہ مریک وخت اس کہ دا پروگرام نا رداٹ داخلی ناجوڑی تا درمان ہرافتے ٹی بائی پاس، انجیو، پلاسٹی ، ہشنگوک آ بندغ آک، شکست، کینسر و شوگر نا ناجوڑ اکن 600,000 روپئی فی خاہوت سالانہ خڑچ کننگک ۔ عامر محمود کیانی پارے کہ نن دا پروگرام نا پبی وڑاٹ مانیٹرنگ ءِ کننگ اُن۔ ای و کنا ٹیم دا ہیت ءِ المی جوڑ کننگ اُن کہ ہر ہمو آسراتی ہرانا دا پروگرام نار داٹ وعدہ ءِ کننگانے او دا پروگرام آن فائدہ ہرفوک آتے میسر مریک۔ دا پروگرام آن فائدہ ہرفوک آتا سلہ ءِ ہلنگ کن اسہ نظام اس ہم درستی راستی کرفنگانے تانکہ ننے دا معلوم مننگ کے کہ او درمان نا آسراتی آن است جم اریر یا آخا۔ اوپارے کہ دا پروگرام نا رداٹ اُراغا ہسپتال و ہسپتال آن اُرااسکان ٹرانسپورٹیشن نا خڑچ آک ہم اوار ءُ۔ سرکاری و پرائیویٹ ہسپتال آتے مست آن پک مروک آب انا رداٹ پینل آ ہلنگانے۔ اسہ ٹول فری نمبر 0800-09009 اسے نا ہم بست و بند ءِ کننگانے ہراڑان دا پروگرا م نا بابت ہر وخت معلومداری ہلنگ مریک۔ وزیر جان جوڑی پارے کہ داپروگرام نا غٹ مرحلہ غاتے ٹی میرٹ و شفافیت ءِ ہرحال اٹ ممکن کننگانے۔ دا پروگرام آ عملدرآمد ءِ المی جوڑ کننگک و انشاء اللہ دا پروگرام نا بھرم تیان الس فائدہ ہرفک۔
