اسلام آباد۔ 04 فروری (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ کشمیر نا ویل ننا دور حکومت اٹی و کشمیری الس نا است خواہی تا رداٹ ایسر مریک، بھارت ننا مذاکرات نا پیش کش ءِ نزور تکپ، مودی نا ڈرامہ بے سہب مس، مقبوضہ کشمیر نا الس اونا دورہ ءِ مسترد کرے جہانی برادری کشمیر اٹی بھارتی بیدادی نا نوٹس ءِ ہلے۔ ہر فورم آ کشمیری تا توار ءِ بڑز کینہ۔ دوشنبے نادے آ داڑے پریس کانفرنس آن تران کرسا اوپارے کہ مچ آ پاکستان و یورپ اٹی رہینگوک پاکستانی و کشمیری الس (اینو) سے شنبے نادے آ کشمیری تتون یکجہتی نا دے ءِ اڈتننگ ءُ۔ اوپارے کہ مقبوضہ کشمیر نا الس ءِ پاکستان نا الس و حکومت نا کنڈآن اخلاقی، سیاسی و سفارتی مخ تفی نا باوری ایتنہ، وزیر خارجہ لندن اٹی کشمیر آ مروک آ کانفرنس اٹی شریک ءِ وخت اس کہ صدر مملکت ڈاکٹر عارف علوی یکجہتی نا درشانی کن مظفر آباد آ کاہک، مچ آ ملک اٹی کشمیری تتون یکجہتی نا درشانی کن دود، مچی و پروگرام اڈتننگک و انسانی دوتا زنجیر جوڑکننگک، ڈی چوک اسلام آباد اٹی ہم انسانی دوتا زنجیر جوڑ کننگک۔ داکان بیدس اسکول آتے ٹی مقبوضہ کشمیر اٹی بھارتی بیدادی ءِ تالان کننگ کن تقریری مقابلہ و ڈرامہ غاتون اوار چندی پروگرام اڈتننگک۔ اوپارے کہ دنیا ءِ کشمیر اٹی بھارتی بیدادی آن معلومدار کننگک۔ بھارت ہراوڑ مقبوضہ کشمیر اٹی انسانی حق انا خلاف ورزی ءِ کننگ ءِ اونا ترندی اٹ مذمت ءِ کینہ۔
