راولپنڈی۔ 04 فروری (اے پی پی) بنجائی وزیر پٹرولیم و قدرتی وسیلہ غلام سرور خان پارینے کہ ملک ءِ پلوک آتا احتساب ہرحال اٹ مریک، داسہ اوفتے حساب تروئی مریک، و جیل تیا ہنوئی مریک، ہڑتوم آ گیس کمپنیک 142ارب روپئی نا کڑزدار ءُ، اگہ نہاد آتے ٹی ودکی کتونہ تو 154ارب نا پین کڑزدار مسونہ، احتساب غٹ انا مریک ، کہوک آتا اکاؤنٹ آتیا ن ہم پیسہ پیش تمنگ ءِ ، مسلم لیگ بیرہ الیکشن ءِ کٹنگ نا خاطر 55 ارب روپئی نا اسکیم تس، اسہ سال اٹی 50 ارب روپئی نا گیس دُزی مریک۔ داخیال آتا درشانی ءِ او تدوک آ دے اہلیان حلقہ این اے 59 نا کنڈآن تینا شرف اٹی اڈ ہلوک آ دود آن تران کرسا کرے۔ اوپارے کہ 1885 آن ہلیس داوخت اسکان ن لیگ انا برخلاف سلوک اُٹ، تحریک انصاف نئے سودا مریک و نئے کاٹم ءِ شیف کیک، احتساب ہرحال اٹ مریک۔ اوپارے کہ ہڑتوم آ جماعت آتا لیڈر آک تینا لُٹ و پل انا خلیس آن اسہ ایلو تون سیوت کننگ ءُ ہڑتوم آتا لٹ وپل ملک ءِ بھس کرینے، اوپارے کہ الس تون دُو ملفنگ ءِ جوان سرپند کروک آ السی نمائندہ ہمہ مننگ کیک، سوغند ہرفنگ آن پد معلوم مسنے کہ عمران خان ءِ اودیم ڈیل انا پیش کش مسنے ولے او منپننگءِ ، نہ ڈیل مریک نہ ڈھیل احتساب غٹ انا مریک ۔ مچ آ خاہوت نا میرات آک کٹیا غان زیات ءُ۔ داوخت آ تحریک انصاف حلقہ این اے 59 نا راجی و سیاسی شخصیت ملک نعیم اعوان ، امیر افضل ، چوہدری محمد افضل تون اوار علاقہ نا شرفدار آتا بھلو کچ اس ساڑی ئسر۔ غلا سرور خان پارے کہ گچین کاری مہم اٹی پی ٹی آئی الس تون ہراوعدہ غاتے کریسس اوفتے اوفک پورو مریرہ اولیکو گرانٹ روات چک بیلی تون اوار حلقہ نا الس آ خڑچ کیوہ۔ چکری ٹی چونترہ و روات اٹی کالج جوڑ کیوہ، ریسکیو 1122 نا آسراتی تون اوار اوار ہسپتال ہم جوڑ کیوہ ۔ اوپارے کہ ڈغار ی سنٹر نا کچ اٹی ہم ودکی مریک تانکہ الس نا مشکلات آتا ازالہ مننگ کے۔ اوپارے کہ چوہدری نثار علی خان ءِ الس گچین کرے داسہ او سوغند ہلنگ آن خوفزدہ ءِ، عدالت اٹی کیس ءِ زوت فیصلہ مریک۔
