اسلام آباد ۔ 04 فروری (اے پی پی) اسپیکر قومی اسمبلی اسد قیصر پارینے کہ کشمیر نا ویل اسہ علاقائی ءُ جھیڑہ اس اف بلکن حق خودارادیت کشمیری الس نا بنداوی حق ءِ، کشمیر اٹی واک انا کاریم اٹ اتنگ آن آجوئی نا تحریک ءِ توننگ مریک و نئے دا ویل آ پاکستان نا اصولی موقف ءِ بدلیفنگ مریک ۔ داخیال آتا درشانی ءِ او یوم یکجہتی کشمیرنا وخت آ تینا کلہو اٹی کرے ہرا ہرسال کشمیری ایلم تتون یکجہتی نا درشانی کن 5فروری آ آزاد کشمیر تون اوار مچ آ پاکستان اٹ اڈتننگک ۔ سویلی ایشیا و کشمیر نا ویل انا آخبت نا حوالہ ءِ ترسا اسپیکر پارے کہ سویلی ایشیا ٹی ہمووخت اسکان پائیدار امن نا تغ پورو مفک ہراوخت اسکان دنیا نا غٹ آن بھلا نام نہاد جمہوریت بھارت مقبوضہ وادی ٹی واک انا کاریم اٹ اتنگ و جبرو بیدادی ءِ بند کپک۔ اواقوام متحدہ غا زور شاغا کہ او کشمیر نا بابت تینا قرارداد آتیاعملدرآمد ءِ المی جوڑ کے۔ کشمیری الس نا جہد آجوئی کن پاکستان نا مخ تفی و اصولی موقف ءِ تالان کرسا اسپیکر پارے کہ پاکستانی حکومت و الس کشمیری الس نا حق خودارادیت نا جہد نا ہر فورم آ اخلاقی ، سیاسی و سفارتی مخ تفی ءِ برجاتخرہ ۔ اوپارے کہ پاکستان نا پارلیمنٹ کشمیر نا ویل انا پرامن ایسری کن پرعزم ءِ و داچرجوئی ٹی پارلیمنٹ کشمیر نا ویل ءِ اقوام متحدہ سیکورٹی کونسل نا قراردادآتا رداٹ ایسر کننگ و مقبوضہ وادی ٹی بھارتی فوج انا کنڈآن مروک آ بیدادی ءِ توننگ کن چندی قرارداد آتے منظور کرینے۔ اوپارے کہ کشمیر اٹی بھارت نا کنڈآن واک انا زی آ کوزہ، پوسکن آ راج انا اخلاقی اقدار والس نا بنداوی حق خودارادیت نا منافی ءِ۔ ڈپٹی اسپیکر قاسم خان سوری ہم دا وخت آ کشمیر نا ویل آ پاکستان نا اصولی موقف نا اعادہ ءِ کرسا پارے کہ پاکستان مقبوضہ وادی ٹی کشمیری الس نا حق خودارادیت کن برجاجہد نا ہر کہول آ اخلاقی، سیاسی و سفارتی مخ تفی ءِ برجاتخک۔ اوپارے کہ پاکستان مظلوم کشمیری الس نا توار ءِ و مصیبت نا ہر ساہت اٹی اوفتے تون سلوک ءِ ۔
