الس ءِ مون تروک ویل آتا ایسری، گچین پالیسی تا جوڑ کننگ کن صوبہ و بنجانا نیام اٹ رابطہ ءِ گچین کننگے
دیوان اٹی بنجائی سرکڑدہ، پنجاب و خیبر پختونخوا نا وزیراعلیٰ و ایلو تا بشخ ہلنگ
اسلام آباد۔ 04 فروری (اے پی پی) وزیراعظم عمران خان الس ءِ مون تروک ویل آتا ایسری و گچین پالیسی تا جوڑ کننگ کن صوبہ و بنجا نا نیام اٹ رابطہ غاتے گچین کننگ نا پارت کرسا پارینے کہ ساڑی حکومت تینا 6 تُو انا مد ءِ پورو کننگ والا ءِ و تینا دوراقتدار انا مون نا مرحلہ ٹی پترینگانے، پی ٹی آئی تینا دور حکومت اٹی داوخت اسکان الس و ملک انا گچینی کن ہراگام گیج آتے کرینے اوفتے تالان کننگ نا گرج ءِ، الس ءِ بایدے معلوم مرے کہ شونداری نا سپیڈ نا دعویٰ ءِ کروک آک ہراوڑ نا پاکستان اس و ہمرو حالیت ہلسا ہنانو۔ اوداہیت ءِ بڑزکو کہول انا دیوان اسے نا کماشی ءِ کرسا پارے۔ دیوان اٹی بنجائی سرکڑدہ غاتیان بیدس وزیراعلیٰ پنجاب سردار عثمان بزدار ، گورنر خیبر پختونخوا شاہ فرمان، وزیراعلیٰ خیبر پختونخوا محمود خان، صوبائی وزیر آک ہم ساڑی ئسر۔ وزیراعظم صوبہ و بنجانا نیام اٹ کوآرڈینیشن ءِ گچین کننگ نا پارت کرسا پارے کہ گچین کوارڈینیشن نا مسخت الس ءِ مون تروک ویل آتا ایسری کن مربوط و سجفوک حکمت عملی و پالیسی تا جوڑ کننگ ءِ۔ اوپارے کہ ساڑی حکومت تینا 6 تُو انا مد حکومت ءِ پورو کننگ والا ءِ۔ حکومت تینا دوراقتدار نا مون نا مرحلہ ٹی پترینگانے ہراٹی صوبہ و بنجائی حکومت نا نیام اٹ گچین رابطہ غاتا گرج ءِ۔ اوپارے کہ پی ٹی آئی تینا دور حکومت اٹی داوخت اسکان الس و ملک انا گچینی کن ہراگام گیج آتے کرینے اوفتے تالان کننگ نا گرج ءِ۔ وزیراعظم پارے کہ الس ءِ بایدے معلوم مرے کہ ’’شونداری و اسپیڈ‘‘ نا دعویٰ کروک آک ہراوڑنا پاکستان اس و حالیت آتے ہلسا ہنانو۔ اوپارے کہ مشکل انگا وخت اٹی حکومت ءِ سنبھالانن، ادراک ءِ کہ روپئی نا قدر اٹی کمتی نا سوب الس مشکل آتا گواچی ءِ ولے حکومت معاشی حالیت آتا گچینی کن پدریسہ کوشست کننگ ءِ۔ داوخت آ وزیراعظم ءِ وزیر ڈٹ بندی نا کنڈآن آخبت نا اولیت آتا بارواٹی احوال تننگا۔ دیوان ءِ پاننگاکہ چندی صوبہ غاتے ٹی علاقائی شونداری پرخ ءِ کم کننگ کن علاقائی بریبری شونداری فنڈ انا قیام آ سجفنگ انگ ءِ ہراٹی بنجا و تعلقدار صوبائی حکومت آک اواری اٹ پدسلوک آ علاقہ غاتا شونداری کن گام گیج کیرہ وخت اس کہ ایشین ڈویلپمنٹ بینک و ورلڈ بینک انا کمک اٹ ملک انا پنجا شار تا شونداری آ خصوصی چکار کننگک۔ پاننگاکہ سیل و سوات نا وارخواہی تے کاریم اٹ اتنگ کن روڈ میپ اس جوڑ کننگ انگ ءِ۔ وزیراعظم نا وژن نا رداٹ علم آ مبنی معیشت اس مون آ دننگ انگ ءِ۔ دیوان اٹی بنجائی حکومت و صوبہ پنجاب و خیبر پختونخوا نا وزیر آتا کنڈآن جان جوڑی ، تعلیم، کشت وکشار و ایلو بشخ آتے ٹی داوخت اسکان چست کروک آ گام گیج آتیا احوال تننگا۔ وزیر خزانہ نا کنڈآن وزیر اعظم ءِ پاننگاکہ پنجاب اٹی 7 انڈسٹریل زون تا جوڑ کننگ نا سلاہ وسوج بورڈ آف انویسٹمنٹ آ گدریفنگانے۔ زرکاری بورڈ ءِ بروک آ 30 دے اٹی خصوصی اکنامک زون فریم ورک سیل و سوات جوڑ کننگ نا پارت کننگانے۔ پاننگاکہ ساڑی حکومت نا کوشست آتا سوب آن پنجاب اٹی اولیکو وار مچ آ صوبہ ٹی بزغر آتے گنڈیری نا فصل نا پورو ریٹ ملانے۔ خوردنی تیل سن فلاور و کینولانا فصل ءِ مون آ دننگ کن بزغر آتے سبسڈی تننگ انگ ءِ۔ پاننگاکہ پنجاب نا ہشت لکھ بندغ ءِ جان جوڑی کارڈ تننگ نا عمل 20 تاریخ آن بناکننگک۔ اولیکو مرحلہ ٹی راجن پور، ڈی جی خان ، مظفر گڑھ و ملتان نا الس ءِ جان جوڑی انصاف کارڈ تننگک۔ وزیر اعظم ءِ معلومدار کننگاکہ 2019 ء نا ایسر اسکان پنجاب نا 36ضلع غاتا الس ءِ جان جوڑی انصاف کارڈ انا تننگ ناعمل ءِ پورو کننگک۔ داوخت آ وزیراعظم کشت و کشار نا بشخ ءِ مون آ دننگ آ خصوصی چکار کننگ نا پارت کرسا پارے کہ کشری بشخ انا شونداری آن الس ءِ غریبی آن کشنگ اٹ کمک رسینگک۔ اومچ آ ملک انا ہسپتال آتے ٹی جان جوڑی نا بست و بند و خصوصی سَفائی نا آب ءِ المی جوڑ کننگ نا پارت نا ہم پارت کرسا پارے کہ ہسپتال انتظامیہ غا دا واضح کننگے کہ صفائی نا آب آ ہچ ءُ رعایت اس کننگپک ، وزیرآک ہسپتال آتا باقاعدگی اٹ دورہ ءِ کیر۔ وزیر ڈٹ بندی احوال تس کہ رشکئی اکنامک زون بھاز زوت آپریشنل کننگک۔ داوخت آ فنانس، کشت وکشار ، جان جوڑی و تعلیم نا بشخ آتے ٹی کوآرڈینیشن نا گچینی کن وزیرآتا ورکنگ گروپ اس ہم جوڑ کننگا۔
