کراچی۔ 04 فروری (اے پی پی) گورنر سندھ عمران اسماعیل پارینے کہ 5 فروری آ یوم یکجہتی کشمیر نا مسخت بیدادی نا گواچی تینا کشمیری ایلم تتون یکجہتی نا درشانی ءِ کننگ مسخت ءِ تانکہ مچ آ دنیا ءِ باور کرفنگے کہ نن غٹ مقبوضہ کشمیر اٹی بھارتی فوج انا بیدادی نا نشانہ مروک آ تینا کشمیری ایلم تتون ہم کوپہ اُن۔ یوم یکجہتی کشمیر نا وخت آ دوشنبے نادے آ جاری کروک تینا کلہو اٹی گورنر پارے کہ کشمیری تا حق خودارادیت و تینا مذہبی و راجی وڑوڈول انا رداٹ زند ءِ تدیفنگ کن آجوئی کن توار بڑز کننگ اوفتا اخلاقی و راجی حق ءِ و دنیا نا ہچ ءُ طاقت اس اوفتے دا حق آن محروم کننگ کپک۔ اوپارے کہ اقوام متحدہ نا قرارداد آتا رداٹ کشمیر نا ویل ءِ ایسر کننگ آن بیدس ڈیہہ ٹی پائیدار امن نا تغ پورو مننگ کپک ، ہڑتوم آ سرکڑدہ غاتے اواری اٹ تولسا دا ویل انا ایسر اس پٹوئی مریک ہراکہ وخت انا اہم انگا خواست ءِ۔ گورنر سندھ پارے کہ پاکستان اٹی حکومت ہرکس نا کہ مرے ولے کشمیر نا ویل اکن نن غٹ اسہ توار اُن انتئے کہ دا الس نا توار ءِ، ہر اسہ پاکستانی نا است تینا کشمیری ایلم تتون دھڑکک۔ اوپارے کہ پنچ فروری اسہ تاریخ ساز ءُ دے اسے ۔ اوپارے کہ داسہ بھارت اٹی ہم دانشور آتا اسہ بھلو تپہ اس کشمیری تا حق خودارادیت نا مخ تف مسنے ۔ گورنر سندھ پارے کہ دابھاز مشکل ءِ کسر اسے ہرا دے کشمیری ورناک اختیار کرینو ولے مچ آ مسلم امہ نا مخ تفی اوفتے تون ءِ۔
