اسلام آباد۔ 01 فروری (اے پی پی) چیئرمین سینیٹ محمد صادق سنجرانی تون بنجائی وزیر ریلوے شیخ رشید احمد پارلیمنٹ ہاؤس اٹی اوڑدہی کرے و بلوچستان خاص کر چاغی ٹی ریلوے لین ءِ گچین جوڑ کننگ آ گپ و تران کریر۔ چیئرمین سینیٹ پارے کہ سی پیک نا سوب بلوچستان اٹی شونداری نا اسہ پوسکن ءُ دوراس بناکیک و کاروباری ہن و بر اٹی ترندی بریک ہراڑکن المی ءِ کہ مواصلاتی نظام و خاص وڑاٹ ریلوے لین تے گچین جوڑ کننگے تانکہ کاروباری مسخت آتے کن اسہ جوان ءُ نظام اس میسر مرے۔ چیئرمین سینیٹ پارے کہ بلوچستان نا کسر تے اٹ زائر آتا اسہ بھلو کچ اس ایران آ سفرکیک و دازائر آتے کن ہائی اسپیڈ ٹرین بے کچ المی ءِ تانکہ زائر آتے گچین آسراتی فراوان کننگ مرے۔ چیئرمین سینیٹ چاغی ریلوے لین ءِ ڈبل کننگ نا ہم سلاہ تس و پارے کہ گڑاتا ترسیل کن ہم کارگو ٹرین تا بست و بند بے کچ المی ءِ تانکہ واپاری سرجزآتے پین مون آ دننگے۔ بنجائی وزیر ریلوے چیئرمین سینیٹ ءِ ہروڑاٹ کمکاری نا باوری ترفسا پارے کہ حکومت بلوچستان نا الس نا ویل آتیان جوانی اٹ بلد ءِ و ننا ہروڑاٹ کوشست ءِ کہ بلوچستان و خاص کر چاغی ریلوے ٹریک ءِ پین گچین جوڑ کننگے تانکہ الس ءِ آسراتی مرے۔
