اسلام آباد۔ 01 فروری (اے پی پی) ڈپٹی چیئرمین سینیٹ سینیٹر سلیم مانڈوی والا پارینے کہ پاکستان و بھارت نا نیام اٹ اقتصادی کمکاری ءِ مون آ دننگ کن متکن آ ویل انا پرامن ایسر بے کچ المی ءِ تانکہ سازگار چاگڑد اس جوڑ کرسا ہڑتوم آ ملک آک شونداری نا کنڈا روان مننگ کیر۔ ڈپٹی چیئرمین سینیٹ داخیال آتا درشانی ءِ بھارت نا ہائی کمشنر اجے بساریہ تون پارلیمنٹ ہاؤس اٹی اوڑدہی ٹی کرے۔ سینیٹر سلیم مانڈوی والا سلاہ تس کہ ہڑتوم آ ملک آتا نیام اٹ پارلیمنٹری فرینڈ شپ گروپ اس جوڑ کننگے ہرا ہڑتوم آ ملک آتا نیام اٹ متکن آ جھیڑہ غاتا ایسر کننگ کن گام گیج چست کننگ کیر۔ اوپارے کہ پارلیمنٹری ڈپلومیسی ءِ موقع تننگے کہ او ہڑتوم آ ملک آتا نیام اٹ کمکاری ءِ مون آ دننگ کن کڑد ادا کیر۔ دا بابت پاک انڈیا بزنس فورم ہم ہڑتوم آ ملک آتا نیام اٹ واپار و کمکاری نا مون آ دننگ کن گچین کڑد ادا کننگ کیک۔ ڈپٹی چیئرمین سینیٹ پارے کہ ساڑی وخت اٹی ہڑتوم آ ملک آتا نیام اٹ واپار نا کچ بھاز کم ءِ۔ ہندن ءُ گام گیج چست کننگے ہرافتا سوب معاملہ غاتے ایسر کرسا تین پہ تینی واپاری ءِ مون آ درسا ہڑتوم آ ملک آک شونداری نا کسر آ روان مننگ کیر۔ ڈپٹی چیئرمین سینیٹ پارے کہ ہمسایہ ملک انا کنڈآن پاکستان آبروک آتے حکومت پاکستان آسراتی تننگ ءِ، بھارت ہم ویزہ نا نظام ءِ آسان جوڑ کرسا پاکستانی تے کن آسانی ودی کے۔
