پشاور۔ 01 فروری (اے پی پی) وزیر مملکت داخلہ شہریار آفریدی پارینے کہ امن و شونداری ننا آخبتءِ ، پاکستان دشمن تے کلہو ایتک کہ نن اسٹ اُن و غیرتی ءُ قوم اسے آنبار دنیا نا ملک آتا خن تے ٹی خن تے خلسا ہیت کننگ ءِ چانہ۔ جمعہ نادے آ کوہاٹ یونیورسٹی ٹی چین نا کمک اٹ جوڑ کروک آ سینٹر فار ٹریننگ ٹیچنگ اینڈ ریسرچ سنٹر نا بنائی دود آن تران کرسا شہریار آفریدی پارے کہ سویلی ضلع غاک واپار نا ہند جوڑ مسنو انتئے کہ دا قدرتی وسیلہ غاتیان ہمپوک ءُ ضلع ءُ۔ اوپارے کہ صوبہ خیبر پختونخوا نا سویلی ضلع غاک ہراکہ سینٹرل ایشیا نا گیٹ وے ءُ ، ٹی زرکاری نا بھلو وارخواہی ارے و حکومت پیشن نا زرکاری نا است بڈی ءِ کننگ کن دورس گام گیج کرینن ہرافتے ٹی 183 ملک آتے کن آن لائن ویزہ آسراتی و پنجا ملک آتا باتی تے پاکستان آ سرمننگ آ ویزہ تننگ نا آسراتی اوار ءِ ۔ اوپارے کہ دا آسراتی یورپ، امریکہ وکینیڈا ٹی رہینگوک آ ہندوستانی تے کن ہم ارے، چائے اوفتا تعلق ہراکہ مذہب آن مرے۔ اوپارے کہ پاکستانی ویزہ ہلنگ نا وڑوڈول آ مہالو تُوتا تُو لگاکہ داسہ داوڑوڈول ءِ آسان کننگانے و داسہ دا وڑوڈول آ ہفت آن دہ دے لگک ۔ اوپارے کہ نن دنیا ءِ سلہ خلینہ و بریر داڑے زرکاری کیر ہراڑے زرکاری آ کٹیا دنیا نا ایلو علاقہ غاتیان بھاز زیات ءِ۔ اوپارے کہ پاکستانی الس و سیکورٹی فورس آتا ورناتا لازوال قربانی تا سوب آن داڑے امن مسنے و سویلی خیبر پختونخوا ہنداخہ پرامن ءُ علاقہ اسے اخس کہ دنیا نا شون ہلوک ملک آتا علاقہ غاک ءُ ہرانا شاہدی چائنہ نا سفیر نا داڑے کوہاٹ یونیورسٹی آ بننگ و دود اٹی بشخ ہلنگ ءِ۔
