کوئٹہ۔ 31جنوری (اے پی پی) ڈائریکٹر جنرل نیب بلوچستان محمد عابد جاوید پارینے کہ قومی احتساب بیورو کانود نا حکمرانی و بے پرخ احتساب نا فلسفہ غا باور کیک۔ قومی وسیلہ غاتا روا کاریم اٹ اتنگ و ملکی پلوک آ دولت نا ہر حالت اٹ پدی اتنگ اولیت آتے ٹی اوار ءِ، بلوچستان اٹی شونداری و شونہالی نا تسلسل کن سخت احتساب المی ءِ، مفاد عامہ نا ڈٹ آتے ٹی ہرے و وڈی خور ی سگ انا قابل افس، الس نا وڈی خوری نا بابت غاو تیا عملدرآمد ءِ المی جوڑ کننگک۔ داخیال آتا درشانی ءِ او پنچ شنبے نا دے آ کھلی کچہری ٹی سائل آتون گپ و تران کرسا کرے۔ ڈائریکٹر جنرل نیب سائل آتے کرپٹ عنصر آتا برخلاف دمدستی کارروائی نا باوری ترفسا پارے کہ قومی احتساب بیورو کرپٹ عنصر آتے کانود نا وڑاٹ سزا تننگ کن ہروڑنا کوشست کیک۔ اوپارے کہ ملکی شونداری و شونہالی نا سفر نا سرسہبی کن مربوط و سخت احتساب المی ءِ۔ بلوچستان اٹی چندی ڈٹ وڈی خوری و غیر ضروری ہرے مننگ نا گواچی ءُ ہرافتا سوب آن لس بندغ براہ راست زہمی ءِ دُن انگا غٹ ڈٹ آتے ہرا ذاتی فائدہ غاتا اوفتے پورو کننگ کن تعلقدار کمامدار آتے پابند کننگ انگ ءِ۔ ڈی جی نیب بلوچستان محمد عابد جاوید وڈی خوری نا پورو چٹفنگ کن الس نا کمک ءِ المی گوندسا پارے کہ الس نا کمک اٹ وڈی خور عنصر آتے تنیاکننگ مریک۔ داکان مست ڈی جی نیب غاو سیل انا انچارج ءِ چندی غاو تیا دمدستی کارروائی کننگ نا پارت کرے۔
