بنجائی وزیر جان جوڑی عامر محمود کیانی اِرا پوسکن ءُ ایمبولینس ہولی فیملی ہسپتال نا دوٹی تس

ایمبولیس آتے ایم او ایل گروپ ہسپتال کن بطور عطیہ تسوسس
اسلام آباد۔ 31جنوری (اے پی پی) بنجائی وزیر جان جوڑی عامر محمود کیانی اِرا پوسکن ءُ ایمبولینس ہولی فیملی ہسپتال نا دوٹی تس ہراکہ ایم او ایل ہسپتال کن بطور عطیہ تسوسس۔ داوخت آ ایم او ایل گروپ نا ریجنل وائس پریذیڈنٹ علی مرتضیٰ عباس ہم ساڑی ئس۔ اوکان پد بنجائی وزیر جان جوڑی عامر محمود کیانی ہولی فیملی نا دورہ ءِ کرے ۔ داٹی نعیم الحق ہم بنجائی وزیر جان جوڑی تون اوار ئس۔ اوہسپتال نا چندی وارڈ آتا معائنہ ءِ کرے۔ بنجائی وزیر جان جوڑی ہسپتال اٹی ناجوڑ آتے تروک آ آسراتی تا جاچ ءِ ہلک۔ داوخت آ اوپارے کہ وزیراعظم عمران خان نا پارت آ ہسپتال نا کارکڑد ءِ گچین جوڑ کننگ کن کوشست کننگ اُن ، وزیراعظم نا پارت آتے مون آتخسا ہولی فیملی ہسپتال نا شونداری کاریم 70 درسد آن زیات پورو مسنے، ہولی فیملی ہسپتال اٹی زالبول نا وارڈ سد بیڈ و چناتا وارڈ اٹی ہم سد بیڈز آتا ودکی کننگانے۔ عامر محمود کیانی پارے کہ داسہ اسہ کٹ آ 2,2 چنا یا زالبول ءِ تخنگ نا گرج مفک۔ ہسپتال اٹی صفائی نانظام ءِ جوان جوڑ کننگانے۔ وزیر جان جوڑی پارے کہ ہسپتال اٹی ڈاکٹر و عملہ نا ڈیوٹی نا وخت ءِ المی جوڑ کننگانے تانکہ ناجوڑ آتا مشکل آتا بروخت ازالہ مرے و وخت اس کہ دوائی تا بلاتعطل فراوانی ءِ المی جوڑ کننگک۔ اوپارے کہ لس بندغ ءِ جان جوڑی نا آسراتی تے المی جوڑ کننگ کن غٹ تر وسیلہ غاتے کاریم اٹ اتینہ۔ اوداعزم انا درشانی ءِ کرے کہ درمان غریب آتا حق ءِ و ڈکھیا انسانیت نا کمک ءِ کننگ ننا مذہبی و اخلاقی فرض ءِ و جان جوڑی نا بشخ اٹی گچینی کن انقلابی کاریم کننگ اُن۔