تھائی لینڈ انا فضائیہ نا کمانڈر ان چیف نا ایئر ہیڈ کوارٹر ز اسلام آباد نا دورہ، پاک فضائیہ نا سروک ایئر چیف مارشل مجاہد انور خان تون اوڑدہی

اسلام آباد۔ 31جنوری (اے پی پی) رائل تھائی لینڈ فضائیہ نا کمانڈر ان چیف ، ایئر چیف مارشل چیاپُرک دِدیا سارن پنچ شنبے نادے آ ایئر ہیڈ کوارٹر اسلام آباد نا دورہ ءِ کرے و پاک فضائیہ نا سروک ایئر چیف مارشل مجاہد انور خان تون اوڑدہی کرے۔ ترجمان پاک فضائیہ نا رداٹ ایئر ہیڈ کوارٹر آ بننگ آ پاک فضائیہ نا سروک ایئر چیف مارشل مجاہد انور خان اودے بخیر کرے۔ پاک فضائیہ نا چاق و چوبند دستہ اودے سلامی پیش کرے۔ اوکان پد اوپاک فضائیہ نا سروک ایئر چیف مارشل مجاہد انور خان تون اونا آفس اٹی اوڑدہی کرے۔ اوڑدہی ٹی تین پہ تینی است خواہی و کسبی معاملہ غاتون اوار علاقائی امن و سوگوی نا حالیت آتیا گپ و تران کننگا۔ رائل تھائی لینڈ فضائیہ نا کمانڈر ان چیف پاک فضائیہ نا بندغ آتا کسبی مہارت نا ستا ءِ کرے و دہشت گردی نا برخلاف جنگ اٹی پاک فضائیہ نا سرسہبی تا ستا ءِ کرے۔ ایئر چیف شرفمند آ مہمان ءِ پاک فضائیہ نا خود انحصاری نا چندی ڈٹ آتابارواٹ معلومدار کرے۔ اوڑدہی ٹی ہڑتوم آ شرفمند آ شخصیت آک تین پہ تینی کمک و دفاعی تعلقداری تے پین سوگو کننگ آ زور شاغار ہرانا سوب ہڑتوم آ ملک آتا نیام اٹ بالعموم و ہڑتوم آ فضائی فوج انا نیام اٹ خاص کر دوستانہ تعلقداری تے پین ودفنگک۔ رائل تھائی لینڈ فضائیہ نا کمانڈر ان چیف پاک فضائیہ نا سلہ غا پاکستان نا سرکاری دورہ غاٹے۔