وزیراعظم نا ’’سلام پولیو ورکر‘‘ نا ہیش ٹیگ سوشل میڈیا غا ٹاپ ٹرینڈ جوڑ مس

اسلام آباد۔ 31جنوری (اے پی پی) وزیراعظم عمران خان پارینے کہ پولیو ورکرآتا عزم پاکستان ءِ پولیو آن پاک ملک اس جوڑ کننگ نا مسخت نا دوئی کننگ ءِ المی جوڑ کیرہ۔ اوداہیت ءِ پنچ شنبے نادے آ اسہ پولیو ورکرعرفان نا عکس اتون اوار تینا ٹویٹ اٹی پارے۔ عرفان نا دا عکس سوشل میڈیا غا وائرل ءِ ہراٹی او یخ اٹی وادی سوات اٹی تینا پولیو کٹ ءِ ہرفسا کیہی فٹ بڑز برف اٹی کسر اس جوڑ کرسا فرض ءِ پورو کننگ کن مزل نا کنڈا راہی روان ہُننگ مریک۔ وزیراعظم عرفان تون اوار تینا اسہ عکس اس ہم شیئر کرے ہراڑتون او وزیراعظم آفس اٹی تدوک آ دے اوڑدہی کریسس و وادی سوات اٹی چناتے پولیو نا خراب انگا ناجوڑی آن بچفنگ کن اوناواونا سنگت آتا جوزہ غاتا ستاءِ کرے۔ وزیراعظم عمران خان تینا ٹویٹ اٹی پارے کہ عرفان 2لکھ 60 ہزار ہیرو تیان اسٹ ءِ ہرا بے کچ سخت موسمی حالیت آتے ٹی پولیو نا پڑی کنفنگ کن چناتسکان سرمریک۔ وزیراعظم پارے کہ دا وائرل ویڈیو ہر بندغ کن شرف و فخر انا احساس اس تخک۔ وزیراعظم ’’سلام پولیو ورکر‘‘ نا ہیش ٹیگ ہرا سوشل میڈیا غا ٹاپ ٹرینڈ مسنے، تون اوار تینا ٹویٹ اٹی پارینے کہ داوڑنا جوزہ غان نن پولیو آن پاک قوم اس جوڑ مننگ نا مسخت ءِ دوئی کننگ نا قابل مرینہ۔