اسلام آباد۔ 30 جنوری (اے پی پی) سی پیک آن پاکستان اٹی معاشی سوگوی اس بریک، سی پیک آن تعلقدارڈٹ آتے ٹی داوخت اسکان 70 ہزار پاکستانی تے روزگار ملانے وخت اس کہ چینی باتی تا کچ 10 ہزار ءِ، چین ڈیہہ ٹی معاشی شونہالی و رابطہ غاتے خواہک دامسخت کن 6اقتصادی راہداری تا بناءِ کرینے ہرافتیان اسٹ سی پیک ءِ ہرا پاکستان و چین نا نیام اٹ اسہ اہم ءُ گام اسے۔ سی پیک سیکرٹریٹ نا کمامدارآک اے پی پی ءِ پاریر کہ ڈٹ انا رداٹ 15سال اٹی 2.3ملین پوسکن ءُ ملازمت ودی کننگ اٹ کمک رسینگک۔ افرادی واک انا تربیت، فنی و کسبی تعلیم کن پاکستان ءِ چین آن کمک ہلنگ نا گرج ءِ تانکہ ورناتپہ ءِ کسبکار جوڑ کرسا سی پیک نا رداٹ ودی مروک آ افرادی واک انا طلب ءِ پورو کننگ تون اوار اوار بے روزگاری نا کچ ءِ ہم کم کننگ مریک۔ اوپاریر کہ بنداوی ڈھانچہ و توانائی نا بشخ آتیا خصوصی اہمیت تننگ انگ ءِ ۔ اوپاریر کہ اسہ روڈ اسہ ڈیہہ ڈٹ انا رداٹ سی پیک اٹی روڈ و ریل انا نیٹ ورک نا شونداری و گچینی نا گام گیج آتون اوار اوار صنعتی بشخ اٹی ہڑتوم آ کنڈآتا کمکاری ءِ ہم بنداوی اہمیت تخک۔ سی پیک نا رداٹ 2030 ء اسکان روزگار نا پوسکن ءُ وارخواہی ودی مریک ہراڑان بے روزگاری نا کچ ءِ کم کننگ اٹ کمک رسینگک۔
