واشنگٹن۔ 04مئی (اے پی پی) امریکہ کن پاکستان تون تعلقداری المی ئِ و امریکی انتظامیہ حکومت پاکستان نا مخ تفی و کمکاری ئِ ہروڑاٹ برجاتخک۔ داہیت ئِ امریکی محکمہ خارجہ نا ترجمان جان کربی تدوک آ دے پارے۔ امریکہ نا کنڈآن ایف۔16فراوان کپننگ نا دروشم اٹی متبادل بست و بند انا بارواٹی بیان آ تران کرسا امریکی ترجمان پارے کہ حکومت آک داڈول نا فیصلہ غاتے تینا دفاعی گرج آتے مون آ تخسا و آزادانہ وڑاٹ کیرہ۔ ولے ہراتسکان پاکستان تون تعلقداری نا معاملہ ئِ دا امریکہ کن بے حد اہم و المی ئِ خاص وڑاٹ دننگا دروشم اٹی ہراتم پاکستان سویلی ایشیاکون آ اہم ڈیہہ ٹی واقع ئِ و امریکہ پاکستان تون تعلقداری تے نظرانداز کننگ کیک نہ ہی اوٹی سرد مہری نا گواچی مننگ کیک اسہ پین سوج اسینا ورندی ٹی امریکی ترجمان پارے کہ امریکہ مسکوہی کیہی سال آن پاکستان نا مخ تفی و کمک ئِ کننگ ئِ و دا چرجوئی خاص وڑاٹ دہشت گردی نا برخلاف پاکستان نا لائخی تا بارواٹی گرج آتا بابت برجاتخنگک۔ امریکی ترجمان مستی پارے کہ پاکستان تون کمکاری ٹی ودکی نا گام گیج آتا پٹنگ برجاسلک۔
