نیوٹیک نا تربیتی پروگرام تیٹی سانحہ مستونگ نا زہمی خاہوت آتا زیات آن زیات ورناتے اوار کننگے
اسلام آباد ۔ 17 جولائی (اے پی پی) نگران وزیراعظم جسٹس (ر) ناصر الملک بنجائی وزارت تعلیم و کسبی تربیت ءِ پارت کرینے کہ نیوٹیک ناتربیتی پروگرام تیٹی سانحہ مستونگ نا زہمی خاہوت آتا زیات آن زیات ورناتے اوار کننگے تانکہ او روزگار کٹیا کننگ نا قابل مرسا تینا خاہوت آتا مالی کمک ءِ کننگ کیر ۔ اوداہیت ءِ سے شنبے نادے وزیراعظم آفس اٹی بنجائی وزارت تعلیم و کسبی تربیت نا بارواٹی احوال تننگ نا کماشی ءِ کرسا پارے ۔ وزیر تعلیم و کسبی تربیت محمد یوسف شیخ وزیراعظم ءِ وزارت نا سرسہبی و مینڈیٹ نا بارواٹ معلومدار کرے ۔ وزیراعظم ءِ پاننگاکہ نیشنل ایجوکیشن پالیسی 2018ء آوزارت نا کنڈآن گڈیکو دروشم تننگانے ۔ مچ آ ملک اٹی نصاب نا معیار بندی کن قومی نصاب کونسل اس ہم جوڑ کننگانے ۔ ہنداوڑ وزارت قومی نصاب ڈھانچہ اس جوڑ کرینے ہرا نصاب اٹی ہم آہنگی کن اسہ ماڈل اسے نا وڑاٹ کاریم کیک ۔ پاننگانے کہ پری ۔ 1 آن گریڈ 8 اکن بنجائی کہول آ وزارت نا کنڈآن پوسکن ءُ نصاب جوڑ کننگانے ۔ دا نصاب آن صوبہ غاتے معلومدار کننگک ہرافتے تینا درسی کتاب آتیا نظرثانی و اوفتے گچین جوڑ کننگ اٹ کمک رسینگک ۔ ورناتے کسب کار جوڑ کننگ و ہندی و جہانی مارکیٹ آتیٹی کسب کار افرادی واک آتا تیاری کن نیوٹیک (این اے وی ٹی ٹی سی) نا کڑد انا بارواٹ سرجم احوال ہم تننگا ۔ وزیراعظم وزارت تعلیم و کسبی تربیت نا کوشست آتا ستاءِ کرسا پارت کرے کہ مستونگ دھماکہ نا زہمی خاہوت آتا ورناتا زیات آن زیات کچ ءِ نیوٹیک نا تربیتی پروگرام تیٹی اوار کننگے تانکہ او روزگار کٹیا کننگ نا قابل مننگ کیر و تینا خاہوت نا مالی کمک ءِ کننگ کیر ۔ وزیراعظم وزارت ءِ داہم پارت کرے کہ وزارت اسہ جامع ومربوط نظام اس جوڑ کے تانکہ آئین نا آرٹیکل 25-A ءِ دانا حقی روح انا رداٹ نافذ کننگ مرے ۔
