اسلام آباد ۔ 16 جولائی (اے پی پی)بنجائی وزیر کانود و انصاف بیرسٹر سید علی ظفر تون یو این ڈی پی پاکستان نافاٹا گورننس پروجیکٹ نا چیف ٹیکنیکل اسپیشلسٹ سکائی کرسٹنس اوڑدہی کرے ہراٹی فاٹا و پاٹا ناخیبرپختونخوا ٹی ضم کننگ نا بابت معاملہ غایت سجفنگا۔ بنجائی وزیر کانود و انصاف بیرسٹر سید علی ظفر پارے کہ فاٹا ناخیبر پختونخوا ٹی ضم کننگ نا بابت ویل آتے اولیتی بنداو تیا ایسر ءِ المی جوڑ کننگک ۔اوپارے کہ فاٹا نا شاری تے ہم ہمو آسراتی ملک ہرا کے پی کے نا الس ءِ ملنگ ءِ ۔ بنجائی وزیر فاٹا گورننس پروجیکٹ نا چیف ٹیکنیکل اسپیشلسٹ سکائی کرسٹنس ءِ پارے کہ وزیراعظم فاٹا وپاٹا ناکے پی کے ٹی ضم کننگ آن پد آسراتی تا فراوانی کن بنجا و کے پی کے نا کہول آ کمیٹی ٹہیفنگانے ۔اوڑدہی ٹی فاٹا گورننس پروجیکٹ ناچیف ٹیکنیکل اسپیشلسٹ سکائی کرسٹنس بنجائی وزیر ءِ پارے کہ یو این ڈی پی بروک آ چدار سال اٹی فاٹا ٹی تعلیم راجی و معاشی شونداری ،کانود سازی ٹی گچینی و دودوربیدگ تعلقداری تے کن 26 ملین ڈالر فراوان کیک ۔اوپارے کہ یو این ڈی پی نا الس نا ویل آتے ایسر کننگ نا است بڈی ءِ کیک ۔اوفاٹا وپاٹا نا خلقت ءِ آسراتی فراوان کننگ کن بنجائی وزیر سید علی ظفر نا کوشست آتا ستاءِ کرے ۔دیوان اٹی خیبر پختونخوا ،وزارت کانود و انصاف نا کمامدارآک ساڑی ئسر ۔
