اسلام آباد۔ 13جولائی (اے پی پی) نگران وزیراعظم جسٹس (ر) ناصر الملک پارینے کہ ملک انا راجی و اقتصادی شونداری کن انفارمیشن و کمیونیکیشن ٹیکنالوجی نا شونداری المی ءِ، پاک چائنا آپٹیکل فائبر کیبل پروجیکٹ آن پاکستان ءِ ڈغاری کیبل تون رابطہ کاری ٹی آسراتی ملک و دانا سمندری کیبل آ سیبو کم مریک۔ او جمعہ نادے پاک چائنا آپٹیکل فائبر کیبل پروجیکٹ نا بنائی دود آن تران کریکہ۔ داوخت آ انفارمیشن ٹیکنالوجی و ٹیلی کمیونیکیشن نا انچارج وزیر شیخ یوسف، ڈائریکٹر جنرل سپیشل کمیونیکیشن آرگنائزیشن میجر جنرل عامر عظیم باجوہ و پاکستان اٹی چین نا سفیر یاؤجنگ ئسک ہم ساڑی ئسر۔ داڈٹ 2سال نا ریکارڈ مد اٹ پورو مس۔ داٹی راولپنڈی آن خنجرآب اسکان 820 کلومیٹر مریس ڈغار نا تہٹی آپٹیکل فائبر کیبل و کریم آباد آن خنجرآب 172کلومیٹر چاگڑدی آپٹیکل فائبر کیبل نا مواصلاتی انفراسٹرکچر نا شونداری اوار ءِ۔ داکان بیدس راولپنڈی آن خنجرآب چندی ہند آتیا آپٹیکل فائبر کیبل نیٹ ورک نا بیک اپ کن بڑزکو کچ تخوک 26مائیکرو ویو لنکس و 9 سینٹرہم داڈٹ انا بشخ ءُ۔ وزیراعظم ڈٹ انا بے کچ مشکل علاقہ ٹی سرسہب پوروی کن کارندہ غاتا کوشست آتا ستاءِ کرے۔ اوپارے کہ پاک چین اقتصادی راہداری نا رداٹ پورو کروک آ داڈٹ آن پاکستان ءِ ڈغاری کیبل تون رابطہ کاری نا آسراتی ملک و سمندری کیبل آ دانا سیبو کم مریک۔ ہنداوڑ چین ءِ یورپ ، دے ٹکی نیامی و افریقہ تون ٹرانزٹ ٹیلی کام ٹریفک کن متبادل رسینگ ملک ،داڈٹ ملک انا قطبی علاقہ غاتیٹی ٹیلی کام نا بشخ انا شونداری کن کم کمکار جوڑ مریک۔ اوپارے کہ پاکستان چین اتون تینا سنگتی نا بھاز قدر ءِ کیک ہرا ہر آزمائش آ پورو سلیسنے۔ سی پیک ون بیلٹ ون روڈ ڈٹ انا غٹ آن اہم بشخ ءِ ۔ داوخت آ چین نا سفیر تینا تران اٹی پارے کہ آپٹیکل فائبر کیبل سی پیک نا رداٹ پورو مروک آ 9 ڈٹ آتیان اسٹ ءِ و دا ڈٹ پاکستان نا معیشت اٹی کڑد ادا کننگ ءِ ۔ اوپارے کہ ہڑتوم آ ملک آک سی پیک ءِ ڈیجیٹل کوریڈور اٹ بدل کننگ کن کوشست کننگ ءُ۔ آپٹیکل فائبر کیبل ڈٹ انا اِرا سال اٹی پوروی اسہ بھلو سرسہبی اسے۔ داوخت آ دود انا ہند آن خنجر اب اٹی ایس سی او نا دفتر اٹی براہ راست کال انا کمک اٹ صاف آواز و ریئل ٹائم ویڈیو نا مظاہرہ کننگا۔ داکان مست ایس سی او ، چائنا ٹیلی کام گلوبل و پاکستان ٹیلی کمیونیکشن کمپنی نا نیام اٹ کمکاری نا اِرا دستاویز آتیا ہم دستخط کننگا۔
