اسلام آباد۔ 13 جولائی (اے پی پی) نگران وزیر داخلہ محمد اعظم خان پارینے کہ چندی سیاسی جماعت آتا راہشون آتے سیکورٹی گڑتیک ءُ ولے ہارون بلور ءِ سیکورٹی نا ہچ ءُ تھریٹ اس ہلوکہ ، امن و ایمنی کن نگران حکومت صوبہ غاتے ہروڑ کمک فراوان کننگ ءِ ۔ جمعہ نادے ایوان بالا ٹی لس گچین کاری 2018ء ناآزادانہ، شفاف و پرامن اڈ تننگ کن ظاہر مروک آ گڑتی تا بارواٹ حکومتی ورندی ترسا نگران وزیر داخلہ پارے کہ 10 جولائی آاے این پی نا اسہ اومیت دار اسے آ خودکش جلہو مس ، ہمووخت آ40 آن 45 اے این پی نا کارندہ ساڑی ئسر ، ہراتم ہارون بلور بس و کارندہ غاتا آتش بازی نا بناءِ کریر ، اوکان پد پین کارندہ ہموڑے مچ مسر ، ہندن کہ ہارون بلور سرمس تو خود کش جلہو گیر تینے دھماکہ اٹ ترخیفے ہراٹی ہارون بلور تون اوار 22 بندغ شہید مسر ۔ اونا گن مین تون اوار 75 بندغ ٹھپی مسر ۔ اوپارے کہ نن صوبائی حکومت آن سیکورٹی بست و بند آتا بارواٹ سرجم آتے بٹنگانن ۔
