اسلام آباد۔ 12 جولائی (اے پی پی) چین پاکستان اقتصادی راہداری (سی پیک ) نا پروجیکٹ ڈائریکٹر حسان داؤد بٹ پارینے کہ پاکستان اٹی اقتصادی و صنعتی شونداری کن پاک چین اقتصادی راہداری نا رداٹ اسیجائی کاروباری ماڈل تون اوار اوار اسکل ڈویلپمنٹ و کاروباری بندغ آتا تین پہ تین رابطہ غاتے مون آ دننگ انگ ءِ ، سی پیک نارداٹ انفراسٹرکچر ، توانائی ، اقتصادی زون تا جوڑ کننگ تون اوار چندی ڈٹ جاٹ آتا پوروی آن پاکستان نئے بیرہ پائیدار شونداری نا دوئی کننگ اٹ سرسہب مریک بلکن لکھ آ ورناتے روزگار نا وارخواہی دوبریک و الس نا راجی شرحالی ہم المی مریک ، منفی زہم تا چٹفنگ و ڈٹ انا بارواٹ گچین معلومداری نا رداٹ ذرائع ابلاغ نا کڑد بھاز اہمیت تخک۔ اوپارے کہ سی پیک نا رداٹ توانائی ، شاہراہ و گوادر بندرگاہ ءِ شون تننگ نا ڈٹ آتیا ترند رفتاری اٹ کاریم برجاءِ ، داڈٹ تینا تخوک آ وخت اٹی پورو مننگ ءِ، داڈٹ آتا پوروی آن پاکستان نا معیشت نا کسر اٹی بروک آ اڑاند آتے مر کننگ اٹ بھلو حد اسسکان سرسہبی دوئی مریک۔ اونا پاننگ ئس کہ سی پیک نا رداٹ جاری پاکستان و چین نا کمکاری صنعتی شونداری نا مرحلہ ٹی پترینگانے ، دامرحلہ ٹی نئے بیرہ چین بلکن ڈیہہ نا غٹ ملک آک پبی بشخ ہلنگ کیرہ۔ اوپارے کہ پاکستان سی پیک نا رداٹ اڈ ہلوک آ خصوصی اکنامک زون تیٹی زرکاری کن بے کچ لبری پالیسی اس جوڑ کرینے و داکمکاری نا بنداوی مسخت جوائنٹ وینچر ءِ مون آ دروئی ءِ تانکہ پاکستانی صنعت آتا پیداواری لائخی تیٹی ودکی کننگے و ہندا بشخ انا سوب پاکستان نئے بیرہ پائیدار شونداری نا دوئی کننگ اٹ سرسہب مریک بلکن داڑے لکھ آ ورناتے روزگار نا وارخواہی دوبریک۔ اوپارے کہ گدرینگوک آ چار سال اٹی سی پیک آن معاشی کساد بازاری نا چٹفنگ ، پائیدار شونداری ہدف آتا دوئی کننگ اٹ کمک رسینگانے ۔ اوپارے کہ بیلٹ اینڈ روڈ ڈٹ انا کمک اٹ چین، سنٹرل ایشیا، و سویلی ایشیا ءِ گنڈنگک ، دامعاشی شونداری نا کسر ءِ و پاکستان دانا بنجاءِ۔ اوپارے کہ سی پیک اسہ گیم چینجر ءُ ڈٹ اسے، ہراڑآن ڈیہہ نا 3 ارب خلقت فائدہ ہرفرہ۔
