کوئٹہ۔08 جولائی(اے پی پی)پیپلزپارٹیءِ راھشون حلقہ این اے 268ءِ نام گپتگیں امیتوار سردارمحمدعمرگورگیج ءَ گوشت کہ منی حاکمی ءِ وھد ءَ چاغی ءِ ھاترا لہتیں دیمروئی کار بوتگ ات،چاغی ءَ را توان ءِ پھجارگ،نادرا آفس،داکخانہءِ ھوار چاغی ءِ مہلوک ءِ ھاترا گیس ءِ منظوری کنائینتگ ات، انشاء اللہ من ءَ امیت ات کہ مہلوک 25جولائی ءَ من ءَ سوبمند کنائینت ات۔اے گپ آہاں چاغی ءِ تہ گچینکاری جنز ءِ ساعت ءَ اُلسی مچی ءَ گوں تران کنان ءَ گوشت ات،اُلسی مچی ءَ گوں سید نبی ءُُ دگراں ھم تران کتگ۔سردار عمر گورگیج ءَ گوشت کہ پاکستان پیپلز پارٹی جمہوریت ءِ سرا یقین ایر کنگ انت ءُُ ہر وھد اُلس ءِ ووٹاں گوں حاکمی ءَ آھگ انت۔آہاں گوشت کہ پیپلز پارٹیءَ وتی حاکمی ءَ این ایف سی ایوارڈ، صوبگانی وت واکی ءِ ھوار ارباں کلدار ءِ فنڈز داتگ انت۔آہاں گوشت کہ انشاء اللہ پیپلز پارٹی 25جولائی ءَ بیوکیں گچینکاری ءِ تہ بلوچستان ءِ ھوار سرجمیں ملک ءَ چہ سوبمند بوت ءُُ اُلس ءِ ابید رنگ ءُُ پدریچ ءِ ہزمت کن ایت۔آہاں گوشت کہ اُلس 25جولائی ءَ ’’تیر‘‘ ءِ نشان ءِ سرا مہر ءَ جنان ءَ پیپلز پارٹی ءِ امیت وارءَ را سوبمند جوڈ کن انت۔
