سرپانک مزن وزیر جسٹس (ر) ناصر الملک ءِ سروکی ءَ قومی سلامتی کمیٹی ءِ دیوان، منی لانڈرنگ ءُُ ناشرکاری ءِ واستہ فنڈ ءِ پُجاری ءِ گر ءُُ دار ءِ بابت ءَ زمہ واری آنی پیلو کنگ ءِ جزم ءِ درشان
سرپانک وزیر ءِ ھزانگ شمشاد اختر ءَ فنانشل ایکشن ٹاسک فورس ءُُ انٹرنیشنل ءَ را آپریشن ریویوگروپ ءِ پیرس ءَ برجم داشتگیں دیوان ءِ ساھت ءَ بوھوکیں چار ءُُ بچار ءِ بابت ءَ سرجمی ءَ سرپد کت، ایکشن پلان ءِ سرجمیں ھال ءُُ دیمروئی کار آنی بابت ءَ ھیال ریچی کنگ بوت
اسلام آباد۔ 6 جولائی (اے پی پی) قومی سلامتی کمیٹی ءَ منی لانڈرنگ ءُُ ناشرکاری ءِ واستہ فنڈ ءِ پُجاری ءِ گر ءُُ دار ءِ بابت ءَ زمہ واری پیلو کنگ ءِ جزم ءِ درشان کت۔ قومی سلامتی کمیٹی ءِ دیوان آدینگ ءِ روچ ءَ سرپانک مزن وزیر جسٹس (ر) ناصر المک ءِ سروکی ءَ مزن وزیر کارگس ءَ برجم دارگ بوت۔ دیوان ءَ سرپانک وزیر ءِ دیمپان نعیم خالد لودھی، وزیر ءِ درئی کار خارجہ عبداللہ حسین ہارون، وزیر ءِ ھزانگ ڈاکٹر شمشاد اختر، وزیر ءِ توکی کار محمد اعظم خان، وزیر ءِ اھوالکاری ءُُ کانود سیدّ ظفر، چیئرمین جوائنٹ چیفس آف سٹاف کمیٹی جنرل زبیرمحمود حیات، چیف آف آرمی سٹاف جنرل جاوید قمر باجوہ، پاک بحریہ ءِ سروک ایڈمرل ظفر محمود عباسی، پاک بالی اُرد ءِ سروک ایئر چیف مارشل مجاہد انور، ڈی جی آئی ایس آئی لیفٹیننٹ جنرل نوید مختار ءُُ کلانہ ایں اُردی ءُُ السی کارندہ آں بھر زوری کت۔ وزیر ءِ ھزانگ شمشاد اختر ءَ دیوان ءِ بھر زورکیں مردم آناں فنانشنل ایکشن ٹاسک فورس ءُُ انٹرنیشنل ءَ را آپریشن ریویو گروپ ءِ پیرس ءَ بوتگیں دیوان ءِ ساھت ءَ بوتگیں چار ءُُ بچار آنی بابت ءَ سرجمی ءَ سرپد کت۔ ایکشن پلان ءِ سرجمیں ھال ءُُ دیمروئی ءِ کار رپک ءِ بابت ءَ ھیال ریچی کنگ بوت۔ کمیٹی ءَ فورم ءَ وزیر ءِ ھزانگ ءُُ آئی ءِ ٹیمب ءِ کوشت آناں ساڑات۔ دیوان ءِ ساھت ءَ ملک ءَ ھواریں اقتصادی جاور ھال آنی سر ءَ چار ءُُ تپاسی زورگ بوت۔ وزیر ءِ ھزانگ ءَ معشیت ءِ جاور ھال ءِ بابت سرجمیں بریفنگ دات۔
