اسلام آباد ۔ 27 جون (اے پی پی) ادارکی مزن وزیر جسٹس (ر) ناصر الملکءَ پیسریگیں فاٹا ءِ دمگانی تہ ادارہ جاتی کوکا ءِ ہڈ دیگ ءِ سرا زور مان کنان ءَ گوشت کہ بنجاہی حکومت دمگءِ نندوکاں را آسراتی دیگ ءُُ تبدیلی ءِ عمل ءَ را گہتریں وڈ ءَ سرجم کنگ ءَ پہ صوبائی حکومت ءِ کمک ءَ گوں کار کنگ انت۔ آہاں اے گپ چار شمبے ءَ اداخیبرپختونخوا مءِ تہ امن ءُُ ایمنی ءِ جاورھال ءِ باروا دیوان ءِ سروکی کنان ءَ گوشت ات۔ گورنر ہاؤسءِ تہ برجمیں دیوان ءِ تہ گورنر خیبرپختونخوا اقبال ظفر جھگڑا، وزیراعلیٰ خیبرپختونخوا جسٹس (ر) دوست محمد خان، چیف سیکرٹری خیبرپختونخوا، انسپکٹر جنرل پولیس خیبرپختونخوا، صوبائی الیکشن کمشنر ءُُ ٹوھیں بنجاہی ءُُ صوبائی واکدار ءَ بہر زوراتگ۔ آئی جی پولیس کے پی کے محمد طاہر ءَ مردم ءُُ ماڑیانی ءِ ھوالہ ءَ گوں ڈوھ ءُُ اشتہاری ڈوھدارانی دزگیری ،سلاھ ءِ بازیابی ءُُ نیشنل ایکشن پلان ءِ ردا گپتگیں ٹارگٹ ءِ ھوار امن ءُُ ایمنی ءِ استیں جاورھال ءِ باروا تفصیلی بریفنگ داتگ۔سرپد کنگ بوتگ کہ 2004ءَ چہ خیبرپختونخوا پولیس ءِ 1306 کارندہاں وتی ڈیوٹی ءِ ساعت ءَ وتی جان ندر کتگ انت۔دیوان ءَ را صوبہ ءِ تہ سی پیک منصوبگ ءِ رکھگ ءِ ھاترا صوبائی حکومت ءِ سیکیورٹی گامگیج ءِ باروا ھم سرپد کنگ بوتگ۔ آئی جی پولیس ءَ فاٹا ءِ خیبرپختونخوا ءَ گوں ادگام ءِ پدا صوبہ ءِ بدل بوتگیں تناظر ءِ تہ پولیس ءِ ضلورت ءِ باروا سرپدی داتگ۔آہاں پدر کت کہ کے پی کے پولیس ءِ ابید فرنٹیئر کانسٹیبلری، لیویز، گلگت بلتستان ءُُ اے جے کے پولیس ھم صوبگ ءِ تہ لس گچینکاری 2018ءِ ساعت ءَ سیکیورٹی ءَ را سدکی جوڈ کنگ ءِ ھاترا ایر بیت۔مزن وزیر ءَ 2009ءَ چہ صوبہ خیبرپختونخوا ءِ تہ امن ءُُ ایمنی ءِ جاورھال ءِ تہ باز گہتری ءَ را ساڑاتگ ءُُ گوشت کہ صوبہ ءِ تہ امن ءُُ ایمنی ءِ برجم داری ءِ ھاترا خیبرپختونخوا ءُُ مھلوک ءُُ کانود ایر کنوکیں ادارگانی قربانی ستا ءِ لائق انت۔مزن وزیر ءَ صوبگ ءِ تہ لس گچینکاری ءِ وشیں وڈ ءَ برجمداری ءِ ھاترا سیکیورٹی گامگیجانی سرا تسلہ ءِ درشان کتگ۔آہاں اے گپے ءِ سرا زور مان کت کہ گچینکاری ءِ آزاتیں ،ساپ ءُُ پلگاریں ءُُ پرامنیں برجمداری بنجاہی ءُُ صوبائی حکومت ءِ اولی دلگوشی انت۔ایشی ءَ چہ پیش ءَ پشاور ءِ تروتاب ءِ ساعت ءَ مزن وزیر ءَ گورنر خیبرپختونخوا اقبال ظفر جھگڑا ءُُ ادارکی سروزیر جسٹس (ر) دوست محمد خانءِ گوما گورنر ہاوس ءَ جتا جتاھیں گند ءُُ نند کتگ انت۔
