گوادر دکہ ءِ دیمروئی ءِ ھوالگ ءَ جیڈھ آنی واستہ ٹوھیں شور ءُُ سلاھ پیش کنگ بیت
ادارکی مزن وزیر جسٹس (ر) ناصر الملک ءِ وزارت ءِ زرّئی کار آناں پنت ءُُ شون
اسلام آباد ۔ 26 جون (اے پی پی) ادارکی مزن وزیر جسٹس (ر) ناصر الملک ءِ وزارت ءِ زرّئی کار آناں پنت ءُُ شون کت کہ گوادر دکہ ءِ دیمروئی ءِ ھوالگ ءَ جیڈھ آنی واستہ ٹوھیں شور ءُُ سلاھ پیش کنگ بیت۔ آئی ءَ اے گپ ءِ پنت ءُُ شون سئے شمبے ءِ روچ ءَ مزن وزیر کارگس ءَ وزارت ءِ میری ٹوئم افیئرز، ایشی ءِ محکمہ ءُُ وت مستر ادارگ آنی کار ءِ بابت ءَ بریفنگ ءِ سروکی ءَ کنان ءَ دات۔ بُنجاھی وزیر برائے میری ٹائم افیئرز عبداﷲ حسین ہارون، سیکرٹری میری ٹائم افیئرز ممتاز علی شاہ، مزن وزیر ءِ ایڈیشنل سیکرٹری ڈاکٹر کاظم نیاز، چیئرمین پاکستان نیشنل شپنگ کارپوریشن رضوان احمد، چیئرمین پورٹ قاسم اتھارٹی اسد رفیع چندنا، چیئرمین گوادر پورٹ اتھارٹی دوستین خان جمال دینی ءُُ کلانئیں سرکاری کارندہ آں بریفنگ ءِ تہءَ بھر زوری کت۔ سیکریٹری میری ٹائم افیئرز ءَ وزارت میری ٹائم افیئرز، کراچی پورٹ ٹرسٹ، پاکستان ڈیپ واٹر کنٹینر پورٹ، پورٹ قاسم اتھارٹی، گوادر پورٹ اتھارٹی ءُُ وتی وزارت ءِ چیر دستی ءَ ایندگہ ادارگ آنی کرد ءِ بابت ءَ سرجمیں بریفنگ دات۔ کراچی پورٹ ٹرسٹ ءِ کرد ءِ چار ءُُ تپاسی کنان ءَ دیوان ءَ را ھال دات کہ پی ٹی ءَ 2017-18ءِ ساھت ءَ 4341ملین کلدار ءِ سیت کماھینتگ۔ ھمے رنگ ءَ پورٹ قاسم ءَ ھم 2016-17 ءِ ءُُ 2017-18ءِ ساھت ءَ یک شل ءَ 4442 ملین کلدار ءُُ 5870 ملین کلدار کماھینتگ۔ گوادر دکہ ءُُ گوادر فری زون ایریا ءِ دیمروئی ءِ بابت ءَ بریفنگ دیان ءَ سیکرٹری میری ٹائم افیئرز ءَ دکہ ءِ دیمروئی ءِ واستہ پیش کتگیں جتا جتائیں آسراتی آناں سہرا کت۔ آئی ءَ توان ءِ بابت ءَ ءُُ ورگ ءِ آپ ءِ دستیابی ءِ بابت ءَ بازیں جیڈھ آنی ھم تران کت ایشانی سبب ءَ گوادر ءِ ترندیں دیمروئی ءَ رکاوٹ اِت۔ مزن وزیر ءَ وزارت ءُُ ایشی ءِ جتا جتائیں ادارگ آنی کرد ءِ بابت ءَ دل یکیمی ءِ درشان کت۔ آئی ءَ وزارت ءَ را گوادر ءِ دیمروئی ءِ بابت ءَ جیڈھ آنی گیواری ءُُ ماھی گیری ءِ جیڈھ آنی ترندی ءَ گوں گر ءُُ دار ءِ واستہ ٹوھیں ءُُ مھکمیں شور ءُُ سلاھ پیش کنگ ءِ پنت ءُُ شون کت۔
