اسلام آباد۔ 25 جون (اے پی پی) ادارکی مزن وزیر جسٹس (ر) ناصر الملک ءَ الیکشن کمیشن ءِ نیمگ ءَ گچین کاری آنی تیاری آنی سرءَ دل یکیمی ءِ درشان کنان ءَ گوشت کہ آزاتیں ءُُ ساپ ءُُ سلۂ ایں ءُُ ایمنیں گچین کاری ءِ برجائی ءَ را دل یکیمی کنگ الیکشن کمیشن آف پاکستان ءِ بنیاتی زمہ واری اِنت، بُنجاھی ءُُ صوبائی حکومت الیکشن کمیشن ءَ را ایشی ءِ کانودی زمہ واری آنی دیگ ءَ ھمک رنگ ءِ کمک پُجاری ءِ واستہ جزمیگ اَنت۔ آئی ءَ اے گپ دو شمبے ءَ لس گچین کاری 2018ءَ را جوانیں درشانداب ءَ گوں برجائی ءِ واستہ انتظامی ءُُ تیاری آنی بابت ءَ بریفنگ ءِ سروکی ءَ کنان ءَ گوشت۔ مزن وزیر کارگس ءَ داتگیں بریفنگ ءَ وزیر توکی کار محمد اعظم خان، سروزیر پنجاب حسن عسکری رضوی، سروزیز سندھ فضل الرحمن، سر وزیر خیبر پختونخوا جسٹس (ر) دوست محمد خان، سروزیر بلوچستان علاؤ الدین مری، مزن وزیرءِ سیکرٹری سہیل عامر، سیکرٹری الیکشن کمیشن بابر یعقوب فتح محمد، ھزانگ، توکی کار ءُُ دیمپانی ڈو یژن آنی سیکرٹری، چاریں صوبگ آنی چیف سیکرٹریز، اائی جیز ءُُ ایندگہ کلانہ ایں کارندہ آں بھر زوری کت۔ سیکرٹری الیکشن کمیشن ءَ لس گچین کاری ءِ برجائی ءِ واستہ کتگیں گامگیج آنی سرءَ سرجمیں بریفنگ دات۔ آئی ءَ کار رھبند آنی سرجمیں ھال ھم بیان کت اَنت، ھما امیت وار، پریذائیڈنگ اپسرگ ءُُ پولنگ کارندہ ، گچین کاری پرز آنی پیلو کنگ ءِ واستہ کانود ءِ مھکم داروکیں ادارگ، سرجمیں ملک ءَ گچین کاری ءِ مانیٹرنگ ءِ واستہ ھندی ءُُ در ملکی میڈیا ءُُ گچین کاری چار ءُُ بچار کنوک آنی واستہ جوڑ کنگ بوتگ۔
