کوئٹہ۔ 17نومبر (اے پی پی) پاکستان مسلم لیگ (ن) نا سینیٹر سردارمحمد یعقوب خان ناصر ترکی نا صدر رجب طیب اردوان نا دورہ پاکستان نا خیرمقدم ئِ کرسا پارے کہ ترکی مشکل ساہت اٹی پاکستان تون پبی تفینے۔ ترکی صدر نا دورہ پاکستان آن ہڑتوم آ برادر اسلامی ملک آتا نیام اٹ تعلقداری تا اسہ پوسکن ئُ دور اسے نا بناءمریک۔ داہیت ئِ او پنچ شنبے آ ”اے پی پی“ تون ہیت وگپ کرسا پارے۔ سینیٹر سردار محمد یعقوب خان ناصر پارے کہ پاکستان و ترکی مذہبی و تاریخی رشتہ غاتیٹی تفوک ئُ ترکی پاکستان نا سچا و قابل پت دوست ئِ ترک صدر نا بننگ آن ہڑتوم آ ملک آتا نیام اٹ واپار ، راجی و دودوربیدہ ہی تعلقداری تیٹی پین گچینی بریک، اوپارے کہ ترکی وپاکستان نا نیام اٹ لازوال و بے مثل تعلقداریک اریر و ہڑتوم آ ملک آک یک جان و اِرا است ئُ، ترک صدر نا دورہ پاکستان آن ہڑتوم آ ملک آتا نیام اٹ تعلقداری تیٹی پین گچینی و کیہی بشخ آتیٹی کمکاری نا معاہدہ غاتیا دستخط مریک، ترک صدر رجب طیب اردوان نا پارلیمنٹ نا اسیجائی دیوان آن تران اسہ تاریخی ئُ مزل اسے نا نشان نا حیثیت تخک۔
