اقوام متحدہ۔ 22جولائی (اے پی پی) اقوام متحدہ خواست کرینے کہ شام انا قطبی علاقہ حلب انا خلقت آتے امداد تننگ کن ہرہفتہ چل ئُ ہشت گھنٹہ کن جنگ بندی نا پڑو ئِ کننگے۔ فرانس پریس نا رپورٹ نا رداٹ شام اٹی اقوام متحدہ نا انسان دوستانہ امداد نا ورکنگ گروپ نا انچارج جان اگلینڈ پارینے کہ حلب انا قطبی بشخ آ دہشت گرد رڑآتا کنٹرول ئِ و شامی فوج اونا محاصرہ ئِ کرینو۔ اوخواست کرینو کہ دا علاقہ نا دونیم لکھ خلقت آتے امداد تننگ کن ہرہفتہ 48گھنٹہ کن جنگ بندی کننگے۔ اوپارے کہ اونا رڑ انسان دوستانہ امدا دسرکننگ کن تیار ئِ۔ اونا پاننگ ئس کہ حلب انا دے ٹکی علاقہ ئِ آجوکرفنگ نا چپی گنتی نا بناءمسنے۔ جان اگلینڈ دا علاقہ ٹی المیہ ئِ رونما مننگ آن توننگ کن ہرہفتہ جنگ بندی ئِ المی گوندا و پارے کہ شامی فوج 7جولائی آ حلب انا قطبی علاقہ غاتا آخریکو سپلائی لین ئِ ہم کاٹسا اودے آجو کرفینے۔ ارٹ میکو کنڈ شام اٹی جہانی ریڈ کراس کمیٹی نا نمائندہ ماریان گاسر حلب انا باتی تا مشکل و سخت حالیت آتا کنڈا اشارہ کرسا پارینے کہ لس شاریک سخت و مشکل حالیت آتا باوجود پدریسہ استقامت نا درشانی ئِ کننگ ئُ۔
