چین ءِ دری کارانی وزیر ءَ ملائیشیا، آسٹریلیا، کینیڈا ءِ ھمکار ءُ آسیان ءِ سیکرٹری جنرل ءَ گوں گند ءُ نند کتگ، وت مہ وتی مفاد ءِ جیڈھ آنی سر ءَ گپ ءُ تران

بیجنگ ۔22جولائی  (اے پی پی): چین ءِ درئی کارانی وزیر وانگ یی ءَ منیلا ءَ ملائیشیا ءِ درئی کارانی وزیر محمد حسن، آسیان ءِ سیکرٹری جنرل کاؤ کمہورن، آسٹریلیا ءِ درئی کارانی وزیر پینی وونگ ءُ کینیڈا ءِ درئی کارانی وزیر انیتا آنند ءَ گوں جتا جتائیں گند ءُ نند کتگ۔ سی جی ٹی این ءِ رد ءَ چار شمبے ءِ روچ ءَ ملائیشیا ءِ دری کارانی وزیر محمد حسن ءَ گوں گند ءُ نند ءِ ساھت ءَ وانگ یی ءَ گوشت کہ چین ملائیشیا ءِ گوما ھرچ تک ءُ پھنات ءَ نزیکیں رابطہ برجائی ءِ واستہ تیار اِنت، جامع کمک ءَ را گیش گہتر کنگ، سمندری شوبگ ءَ تبادلہ ءُ کمک ءَ را گیش کنگ ءُ چین ءُ ملائیشیا ءِ نیام ءَ یکجائی ءَ سیادی ءَ را دیم ءَ برگ ءِ واستہ تیار اِنت۔ محمد حسن ءَ گوشت کہ چین ملائیشیا ءِ معتبریں سنگت ءُ شریک اِنت، ملائیشیا ون چین ءِ پالیشی ءِ سر ءَ مھکمیں رنگ ءَ عمل کنت، ءُ آسیان ءُ چین ءِ کمک ءَ را سرجمی ءَ دیم ءَ برگ ءَ اِنت۔ آسیان ءِ سیکرٹری جنرل کاؤ کم ہارن ءَ گوں گند ءُ نند ءِ ساھت ءَ وانگ یی ءَ گوشت کہ چین ءَ مدام نیک ھمساھگی ءُ دوستی کمک ءِ پالیشی ءِ سر ءَ عمل کتگ۔ اے سال چین ءُ آسیان ءِ نیام ءَ جامع اسٹریٹجک شراکت داری ءِ جوڑ کنگ ءِ پنچمی سالروچ اِنت۔ وانگ یی ءَ گوشت کہ چین آسیان ءِ گوما کار کنگ ءِ واستہ تیار اِنت تانکہ جنوبی چین ءِ بحیرہ ءِ ضابطہ اخلاق ءِ ھوالگ ءَ شور ءُ سلاھ ءَ را ترند کنگ بہ بیت تانکہ جنوبی چین ءِ بحیرہ ءِ جیڈھ ءَ را سیادی داروکیں فریق آنی نیام ءَ براہ راست گپ ءُ تران ءُ شور ءُ سلاھ ءِ وسیلگ ءَ گیش ءُ گیوار کنگ بہ بیت۔ کاؤ کیم ہارن ءَ دمگی کمک ءِ فریم ورک ءِ تہا آسیان ءِ مرکزی کرد ءِ ھاتر ءَ چین ءِ مھکمیں کمک ءِ ھاتر ءَ منت گپت۔ آئی ءَ گوشت کہ چین آسیان ءِ مستریں جامع اسٹریٹجک شریک اِنت، ءُ آسیان چین ءِ گوما کار کنگ ءِ واستہ تیار اِنت تانکہ دمگی امن ءُ ایمنی ءِ رکھینگ ءُ ایشیا پیسفک ءِ دیمروئی ءُ وشھالی ءَ را گیش کنگ ءِ واستہ گیش ھاسیں کرد پیلو کنگ بہ بیت۔ آسٹریلیا ءِ درئی کارانی وزیر پنی وونگ ءَ گوں گند ءُ نند ءِ ساھت ءَ وانگ یی ءَ گوشت کہ دوئیں ملک آنی سروک آنی یکجائی رہشونی ءِ چیر دستی ءَ چین ءُ آسٹریلیا ءِ سیادی گہتری ءُ دیمروئی ءِ راستیں کشک ءَ انت۔ چین آسٹریلیا ءِ گوما یکے دومی ءِ سر ءَ بھروسہ ءَ را گیش کنگ ءُ دو نیمگی سیادی آنی تہ ءَ برجاھیں پیشرفت ءِ واستہ کار کنگ ءَ تیار اِنت۔ آئی ءَ امیت کت کہ آسٹریلیا اندری کار آنی تہ ءَ مداخلت نہ کنگ ءِ اصول ءِ سر ءَ عمل کنت، دو رند ءَ یلہ دنت ءُ دو نیمگی سیادی آناں گہتر کنگ ءِ رجحان ءَ را برجاہ دارگ ءِ واستہ چین ءِ گوما کار کنت۔ پینی وونگ ءَ گوشت کہ آسٹریلیا یک چین ءِ پالیسی ءِ سر ءَ مھکمیں رنگ ءَ عمل کنت ءُ تائیوان ءِ جتا بوھگ ءِ حمایت نہ کنت۔ کینیڈا ءِ دری کارانی وزیر انیتا آنند ءَ گوں گند ءُ نند ءِ ساھت ءَ وانگ یی ءَ گوشت کہ اے سال ءِ بندات ءَ چہ چین ءُ کینیڈا ءِ سیادی گہتر بوتگ ءُ جتا جتائیں پڑ آنی تہ ءَ کمک ءِ تہ ءَ پیشرفت بوتگ۔ حقائق ءَ اے گپ ثابت کتگ کہ چین ءُ کینیڈا ءِ سیادی ءِ گہتری ءُ دیمروئی دوئیں ملکانی مشترکہ مفاد ءِ تہا انت ءُ یک راستیں تاریخی گچین کاری یے انت۔ انیتا آنند ءَ گوشت کہ کینیڈا یک چین ءِ پالیشی ءِ سر ءَ مھکمیں رنگ ءَ عمل کنت ءُ چین ءِ گوما مزن تک ءِ تبادلہ ءَ را گیش مھکم کنگ ءِ واستہ تیار اِنت، گپ ءُ تران ءِ وسیلگ ءَ اختلاف آناں گیش ءُ گیوار کنگ ءُ کینیڈا ءُ چین ءِ سیادی ءِ دراجیں مدتی، جان سلامتی ءُ مھکمیں دیمروئی ءَ را دیم ءَ برگ ءِ واستہ تیار اِنت۔