مزن وزیر شہباز شریف ءَ پاکستان ءَ را فیفا ورلڈ کپ ءَ جوانیں کارکردگی ءِ پد ءَ مبارک بات

اسلام آباد۔20جولائی  (اے پی پی): مزن وزیر محمد شہباز شریف ءَ فیفا ورلڈ کپ 2026 ءِ تہ ءَ پاکستان ءَ را جوانیں کارکردگی ءِ سر ءَ مبارک بات داتگ ءُ گوشت کہ پاکستان ءِ راجی ٹیم ءَ سرجمیں ٹورنامنٹ ءِ تہ ءَ غیر معمولی مہارت، یکوئی، نظم و ضبط ءُ جوانیں ٹیم ورک ءِ درشان کتگ۔ ’’ایکس‘‘ ءِ موہ ءَ پاکستان ءَ را وتی کلوہ ءِ تہ ءَ مزن وزیر محمد شہباز شریف ءَ گوشت کہ فیفا ورلڈ کپ ءِ سوبمندیں تنظیم ءُ جوانیں میزبانی ءِ پد ءَ امریکی صدر ڈونلڈ ٹرمپ ءُ امریکہ ءِ الس ءَ را مبارک بات دیگ ءَ آں ۔ آئی ءَ پاکستان ءُ قطر ءِ حکومت ءُ الس ءَ را فیفا ورلڈ کپ ءِ یکجاھیں میزبانی ءِ تہ ءَ مثالی شریکداری ءُ جوانیں بندوبست آنی سر ءَ ھم شگر ءُ منت درشان کت۔ مزن وزیر ءَ گوشت کہ آئی ءَ فیفا ءِ صدر جیانی انفانٹینو ءُ سرجمیں فیفا ٹیم ءَ را اے مزنیں گلوبل ایونٹ ءِ سوبمندیں رنگ ءَ برجم دارگ ءِ سر ءَ مبارکی دات، ایشی ءَ چہ بے شک ءَ فٹبال ءَ را گلوبل اسپورٹ ءِ بستار ءَ مھکم کتگ۔ آئی ءَ گوشت کہ یک رندے پد ءَ فیفا ورلڈ کپ ءَ مارا یات داتگ کہ فٹبال یک جھان ءِ زبان اِنت، کہ سیمسراں چہ دیم ءَ رؤت ءُ انسانیت ءَ را یکے دومی ءَ گوں ھمگرنچ کنت۔ آئی ءَ دعا کت کہ اے دوستی، یکوئی ءُ یکے دومی ءِ احترام ءِ تب فیفا ورلڈ کپ ءِ گڈی سوت ءِ کشگ ءَ پد ھم راج ءِ رہشونی ءَ برجاہ بہ دار ایت۔