مزن وزیر شہباز شریف ءَ احسن اقبال ءَ گوں گند ءُ نند ءَ پنت ءُ شون کتگ کہ راجی ارزشت ءِ توامیں دیمروئی منصوبگ ایر کتگیں وھد ءُ پاس ءِ تہ ءَ سرجم کنگ بہ بنت

اسلام آباد۔20جولائی  (اے پی پی):  مزن وزیر محمد شہباز شریف ءَ گوشت کہ السی گہبودی ءِ واستہ دیمروئی منصوبگ آناں وھد ءِ سر ءَ سرجم کنگ، روزگار ءِ موہ آنی پیداک کنگ ءُ پائیدار اقتصادی دیمروئی ءِ ھاترا راجی حکومت ءِ اولی ترجی انت۔ آئی ءَ اے ھیالانی درشانی منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوں گپ ءُ تران کنان ءَ کت، آئی ءَ جمعہ ءِ روچ ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دیوان ءَ سرجمیں ملک ءَ پبلک سیکٹر ڈویلپمنٹ پروگرام ءِ چیر دستی ءَ جاری دیمروئی منصوبگ آنی تہ ءَ دیمروئی ءِ ھوالگ ءَ گپ ءُ تران کنگ بیت۔ وفاقی وزیر ءَ مزن وزیر ءَ را جاری دیمروئی منصوبگ، آہانی پیشرفت ءُ آیوکیں ایکشن پلان آنی بابت ءَ سرپد کت۔ مزن وزیر شہباز شریف ءَ پنت ءُ شون کت کہ راجی ارزشت ءِ توامیں دیمروئی منصوبگ مزنیں معیار ءِ گوما ءُ ایر کتگیں وھد ءُ پاس ءِ تہا سرجم کنگ بہ بنت۔ آئی ءَ گوشت کہ دیمروئی منصوبگ آنی وھد ءِ سر ءَ سرجم کنگ السی گہبودی، روزگار ءِ موہ آنی پیداک کنگ ءُ برجمیں اقتصادی دیمروئی ءِ واستہ حکومت ءِ اولی ترجی انت۔ مزن وزیر ءَ اے گپ ءِ سر ءَ زور پر دات کہ توامیں سیادی داروکیں وزارت ءُ ادارگ وت مہ وتی کمک ءُ موثر رابطہ کاری ءِ وسیلگ ءَ منصوبگ ءِ سرجمی ءِ رفتار ءَ را گیش ترند بہ کن اَنت تانکہ ایشانی میوہ زوتاں چہ زوت الس ءَ سر بہ بنت۔ گند ءُ نند ءَ راجی دیمروئی ءِ جتاجتائیں پڑ ءُ آیوکیں دیمروئی مول ءُ مرادانی بابت ءَ ھم حیال ءُ لیکہ درشان کنگ بوت۔